اقوام متحدہ۔ 07 مئی (اے پی پی) اقوام متحدہ نا سیکرٹری جنرل انتونیوگوتریش مچ آ دنیا ٹی تعینات اقوام متحدہ نا امن وایلو مشن تیٹی 2020ء ٹی خذمت سرتننگ اٹ پرتشدد کارروائی، قدرتی آفت و ایلو واقعہ غاتے ٹی زوال کروک آ 6 پاکستانی تتون اوار جان تے ندر کروک 336 امن کارندہ غاتا شرف اٹ آن لائن یات گاری دود اس اڈ تس۔ دا مرک آک اقوام متحدہ نا تاریخ اٹی اسہ سال اسے ٹی مروک آ غٹ آن زیات مرک آک ءُ۔ داوخت آ اسہ منٹ اسے کن خاموشی اختیار کننگا و جان تے ند رکروک آتا پن ءِ خوانسا بنفنگا۔ داآن لائن اعزازی دود اٹ نئے بیرہ اقوام متحدہ نا امن مشن تیٹی کاریم کروک آ شری و فوجی عملہ بلکن کورونا دین انا دین یا ایلوناجوڑ آتا سوب زندآن دوتے سلوک اقوام متحدہ نا چندی ادارہ غاتا کارندہ غاتے ہم خرا ج تحسین پیش کننگا۔ زوال کروک آ پاکستانی شاری و فوجی تیٹی نیامی افریقی جمہوریہ ٹی اقوام متحدہ نا کثیر الجہتی سالمیت سوگوی نا مشن (ایم آئی این یو ایس سی آر نا امتیاز حسین، جمہوریہ کانگو ٹی استحکام مشن (ایم او این یو ایس سی او) نا سپاہی محمد اظہر عزیز، اقوام متحدہ نا ہائی کمشنر مہاجرین(یواین سی ایچ آر) نا محمد عرفان خان و کاشف سلیم و یونیسیف نا بشیر احمد و عبدالرزاق اوار ءُ۔ داوخت آسیکرٹری جنرل انتونیوگوتریش دود انا بشخ ہلوک آتے پارے کہ اقوام متحدہ نا تاریخ اٹی 2020ء ٹی اقوام متحدہ ٹی غٹ آن زیات مرک مس۔ اوپارے کہ مچ آ دنیا ءِ کورونا دین انا ہلوک آ و بے رحم دین مون تروک ءِ و دانا بھس کاریک برجاءُ ہرانا سوب آن لکھ آ خاہوت تینا دوست آتے گوہانو ہنداخاطرآن اقوام متحدہ دنیا نا قوم تیان جتا اف۔
