اسلام آباد۔ 19اپریل (اے پی پی) بنجائی وزیرانسانی حق ڈاکٹر شیریں مزاری پارینے کہ قومی کمیشن ویمن سٹیٹس نا ٹہیفنگ کن اپوزیشن نا کنڈآن پن رسینگانے، گمان ءِ کہ زوت دانا پڑو ءِ کننگک وخت اس کہ مسلم لیگ (ن) و پیپلزپارٹی نا کنڈآن چنا، کمسن بندی و زالبول آتا بابت کانود جوڑ کننگ آ وزارت انسانی حق و مچ آ پارلیمنٹ ءِ مبارکبادی تننگا۔ دوشنبے نادے آ قومی اسمبلی ٹی ڈاکٹر نفیسہ شاہ پارے کہ انسانی حق انا بابت اہم کانود جوڑ کننگ کن وزارت انسانی حق مبارکباد نا حقدار ءِ۔ دابل انا منظوری بھاز بھلو سرسہبی اسے۔ چنا، زالبول و کمسن بندی تا بابت کانود جوڑ کننگ کن مچ آ ایوان مبارکباد نا حقدار ءِ۔ اوپارے کہ 2008ء آن 2013ء ٹی زالبول آتا بابت کمیشن اس ٹہیفنگاسس ہرا اینو اسکان جوڑ مننگ کتو۔ دا کمیشن ءِ زوت آن زوت جوڑ کننگے۔ بنجائی وزیر ڈاکٹر شیریں مزاری پارے کہ قومی کمیشن زالبو نا جوڑ کننگ کن نن اشتہار تسن۔ اوکان پد اپوزیشن جماعت آتا کنڈآن سلاہ جمعہ نادے آ رسینگا۔ سپریم کورٹ داسہ فیصلہ تسنے گمان ءِ کہ دا کمیشن ءِ زوت ٹہیفنگک۔ مہناز اکبر عزیز پارے کہ انسانی حق انا بابت اہم کانود جوڑ کننگ آ مچ آ ایوان مبارکباد نا حقدار ءِ۔
