اسلام آباد۔ 19اپریل (اے پی پی) مچ آ قوم خواجہ پاک ﷺ تون والہانہ عشق تخک، حکومت مچ آ قوم و پارلیمنٹ نا است خواہی تا رداٹ دا معاملہ ءِ مذاکرات نا کمک اٹ ایسر کننگ کن سنبرینگوک ءِ۔ دوشنبے نادے آ قومی اسمبلی ٹی پالیسی بیان ترسا بنجائی وزیر پیر نورالحق قادری پارے کہ ناموس رسالت نا بابت دا ایوان و مچ آ قوم انا احساس و جوزہ غاک اسہ وڑ ءُ۔ داٹی کس اس ریش والا مرے یا پین اس غٹ انا جوزہ و رسول کریم ﷺ تون والہانہ عشق اسہ وڑ ءِ۔ انتس کہ مس اوڑآ اپوزیشن و حکومت ہڑتوم آک ڈکھیا ءُ۔ اسہ ہم سیاسی و جمہوری حکومت اس داوڑنا حالیت خواپک۔ ہراتم داوڑنا واقعہ مریک تو سانحہ مریک۔ نن منت و سماجت و ہیت وگپ انا کمک اٹ دا معاملہ ءِ جوانی اٹ ایسر کننگ نا کوشست کرین۔ نن مذاکرات نا درگہ ءِ ملان و پارین کہ نن دا معاملہ ءِ پارلیمنٹ اٹ اتنگ ناپابند اُن۔ اسپیکر کمیٹی اس جوڑ کیک ہرانا مون آنم ڈرافٹ پیش کیرہ و دفترخارجہ تینا موقف ءِ پیش کیک۔ نن پارین کہ نن غٹ عالم دین تا شرف ءِ کینہ ولے خارجہ پالیسی نا تعین ءِ حکومت وخت کیک نن اوفتے پارین کہ دا کمیٹی نا مون آپیش مرسا اواودے قائل کیر۔ ننا گپ وتران مسکہ کہ 20اپریل نا کال تننگا۔ حکومت دا خواہک کہ کسر و موٹروے تے یلہ تخنگے و مخلوق ءِ تکلیف رسینگپ۔ اوپارے کہ نبی رحمت ﷺ نا شریعت نا رداٹ تو کسر ءِ بند کرسا جنازہ و نماز ہم ادا کننگ مفک۔ اوپار ے کہ کسر و شاہراہ تے یلہ تخنگ و لس بندغ نا زند انا اڑاند آتے چٹفنگ حکومت وخت انا زمواری ءِ۔ اوپارے کہ تدوک آ نن ہم دامعاملہ غا سلابت نا عمل برجامسنے و داسہ ہم دیوان اس مننگ والا ءِ، ننا کوشست ءِ کہ پارلیمنٹ و مچ آ قوم انا است خواہی نا رداٹ مذاکرات نا کمک اٹ داویل ءِ ایسر کننگے۔ تحفظ ناموس رسالت نا کلہوءِ کس اس داخہ تالان کتنے اخس کہ عمران خان تالان کرینے۔
