اقوام متحدہ۔ 15اپریل (اے پی پی) اقوام متحدہ نا الائنس آف سویلائزیشن (یواین اے او سی) نا ہائی رپریزینٹیٹو اینگل موریٹینوس فرانس نا دیکی شار رینیس اٹ نماز اکن کاریم اٹ اتوک آ ماڑی آ خار تروک نعرہ نوشتہ و مسلمان تا برخلاف نفرت آمیز کارروائی تا ترندی اٹ مذمت ءِ کرینے۔ یواین اے او سی نا ترجمان تدوک آ دے اسہ بیان اسے ٹی پارے کہ ہائی رپریزینٹیٹیو فرانس و مچ آ دنیا نا مسلمان تتون یکجہتی و پرامن روچہ کن نیک است خواہی تا درشانی ءِ کرینے۔ اوفرانس نا شیر رینیس اٹ نماز کن کاریم اٹ اتوک آ ماڑی ایویسینا اسلامک کلچرل سینٹر نا دیوال آتیا نوشتہ کروک آ خارتس نعرہ غاتا مذمت ءِ کرینے۔ میگوئیل اینگل موریٹینوس دادے پرا گندہ ءُ کاریم اس گوندسا پارینے کہ دا جہانی کانود و قوام متحدہ نا قدر و اصول خاص وڑاٹ مذہبی و عقیدہ نا آجوئی آن چپ ءِ۔ اوپارے کہ نن مذہب یا عقیدہ نا بنداو آ نزور تپہ غاتے خار تس تقریر آتا شست کننگ، مسلمان تا برخلاف خار انا درشانی، توہین، نسل پرستانہ گام گیج آتا برخلاف ءُ و داسہ مہالوآن بھاز زیات سیوت و یکجہتی اٹ گام گیج آتے پک کننگ نا گرج ءِ۔ اوزور شاغاکہ تین پہ تینی شریف، بین المذاہب ہم آہنگی و پرامن بقائے باہمی ہمووخت آ دوئی مننگ کیک ہراتم ہربندغ ءِ تینا مذہبی یا عقیدہ ءِ آجو و رکھ وڑاٹ کاریم اٹ اتنگ نا گنجائشت مرے۔ یات سلے کہ یک شنبے نادے آ رینیس شار اٹی نماز کن کاریم اٹ اتوک آ ایویسینا اسلامک کلچرل سینٹر نا دیوال آتیا خارتس تحاریر نوشتہ کننگا و داکان مست ننتیس شار اٹی اراہما مسیت ءِ خاخر لگنگ نا سوب آن اونا درگہ ءِ نسخان رسینگا۔