اسلام آباد۔ 13اپریل (اے پی پی) سپریم کورٹ جسٹس قاضی فائز عیسیٰ نظرثانی کیس انا براہ راست نشریات نا بابت دائر درخواست ءِ مسترد کرینے۔ سے شنبے نادے آ عدالت عظمیٰ آن جاری گونڈ ءُ نوشتہی پرمان نامہ سے ٹی پاننگانے کہ جسٹس قاضی فائز عیسیٰ نظرثانی کیس براہ راست نشان تننگ نا بابت جسٹس قاضی فائز عیسیٰ نا درخواست ءِ مسترد کننگک، سپریم کورٹ گوندانے دہ باسکی لارجر بنچ انا اکثریتی فیصلہ نا بنداو آ جسٹس قاضی فائز عیسیٰ نا براہ راست نشریات نا درخواست ءِ مسترد کننگانے، بنچ انا شش جج جسٹس عمر عطاء بندیال، جسٹس سجاد علی شاہ، جسٹس منیب اختر، جسٹس یحییٰ آفریدی، جسٹس قاضی محمد امین احمد، جسٹس امین الدین خان کیس ءِ براہ راست نشر کننگ نا بابت دائر درخواست نا مخالفت ءِ کرسا اودے مسترد کننگ نا فیصلہ تسنو۔ گونڈ ءُ نوشتہی پرمان نامہ سے ٹی مستی پاننگانے کہ آئین نا آرٹیکل نوزدہ اے انا رداٹ معلومداری اسکان رسینگ السی فائدہ نا معاملہ ءِ۔ عدالت عظمیٰ معلومداری اسکان ہراوڑاٹ رسینگ تننگ کیک دا انتظامی ءُ معاملہ اسے، معلومداری اسکان رسینگ ناوڑوڈول و سرجم فل کورٹ دیوان اٹی انتظامی کہول آ طے کننگک۔ جسٹس مقبول باقر، جسٹس منصور علی شاہ، جسٹس منظور احمد ملک و جسٹس مظہر عالم میاں خیل فیصلہ غا اختلافی نوٹ اس نوشتہ کرینو، کیس انا فیصلہ ءِ داکان پد جاری کننگک۔ جسٹس یحییٰ آفریدی فیصلہ ٹی گونڈ ءُ ودکی نوٹ اس ہم نوشتہ کرینے۔ سے شنبے نادے آ جسٹس عمر عطابندیال نا کماشی ٹی دہ باسکی لارجر بنچ جسٹس قاضی فائز عیسیٰ نظرثانی کیس آ سماعت کرے۔ سماعت اٹی جسٹس عمر عطاء بندیال جسٹس قاضی فائز عیسیٰ نظرثانی کیس براہ راست نشر کننگ نا بابت دائر درخواست آ ڈک کروک گونڈ ءُ فیصلہ اس خوانسا بنفے۔ عدالت عظمیٰ جسٹس قاضی فائز عیسیٰ نظرثانی کیس انا براہ راست نشریات نا درخواست مسترد کرسا گوندانے کہ کیس براہ راست نشر کننگ نا بابت درخواست نا دہ باسکی لارجر بنچ آن شش جج مخالفت کرینو۔ اکثریتی رائے نا بنداو آ کیس براہ راست نشر کننگ نا درخواست ءِ مسترد کننگک۔ سماعت اٹی جسٹس قاضی فائز عیسیٰ روسٹر آ برسا موقف تینا کرے کہ 27 دے آن پد کیس انا براہ راست نشریات نا بابت دائر درخواست آ ڈک فیصلہ ءِ بنفنگانے، فیصلہ نا سرجم سوب آک چوخت جاری مریرہ۔ داوخت آ جسٹس عمر عطاء بندیال جسٹس قاضی فائز عیسیٰ ءِ مخاطب کرسا ریمارکس تس کہ فیصلہ اخہ دے ڈک مس نی دا دے تے حساب کپہ۔ فیصلہ ءِ بنفنگ جج آتا صوابدید ءِ۔ مختصر فیصلہ نا کاپی نے رسینگک۔ نی نظرثانی درخواست آتیا دلیل ایت۔ ہراڑآ جسٹس قاضی فائز عیسیٰ موقف تینا کرے کہ ذہنی وڑاٹ دلیل آتے کن تیار افٹ۔ ہراڑآ جسٹس عمر عطاء بندیال ریمارکس تس کہ نی ذہنی وڑاٹ دلیل آتے کن تیار مر، توہین عدالت نا درخواست آک ہم سماعت کن مقرر مریرہ۔ عدالت عظمیٰ ٹی جسٹس قاضی فائز عیسیٰ نظرثانی کیس انا پین سماعت (اینو) چارشنبے نادے آ مریک۔ یات سلے کہ جسٹس قاضی فائز عیسیٰ نظرثانی کیس انا براہ راست کوریج کن سپریم کورٹ اٹی درخواست دائر کریسس۔ سپریم کورٹ 18 مارچ 2021ء آ جسٹس قاضی فائز عیسیٰ نظرثانی کیس ءِ براہ راست نشر کننگ نا بابت دائر درخواست آ فیصلہ ءِ ڈک کریسس۔
