واشنگٹن۔ 09اپریل (اے پی پی) جہانی مالیاتی فنڈ(آئی ایم ایف) پارینے کہ کورونا دین آن نیزگار ملک آک بھاز بے وڑ زہمی مسر ہرافتا زرگزرانی بحالی کن جم وڑاٹ 550ارب ڈالر درکار ءِ۔ آئی ایم ایف داہیت ءِ تینا ساڑی آ رپورٹ اٹی پارے۔ جہانی ادارہ پارینے کہ دنیا نا کم کٹیا کروک و نیزگار ملک آتے کوویڈ۔ 19نا تنکی آن کشنگ کن جم وڑاٹ 550ارب ڈالر نا گرج انا کساس ءِ۔ داخڑچ آتا پوروی کن جہانی کہول آ سوگو گام گیج المی ءِ، جہانی مالیاتی فنڈ پارے کہ نیزگار ملک آتے کورونا دین اتون مون تننگ کن 2025اسکان 200 ارب ڈالر نا گرج ءِ، ہزگار ملک کون آ شون دوئی کننگ کن کم کٹیا کروک و نیزگاری نا خلوک قوم تے پین 250ارب ڈالر نا گرج مریک۔ داکان بیدس پائیدار زرگزرانی سوگوی کن داوڑنا ملک آتے ودکی 100 ارب ڈالر درکار مریک۔ رپورٹ نار داٹ کم کٹیا ئی ملک آتا زرگزرانی بحالی زہمی مننگ نا چندی سوب آک ءُ ہرافتے ٹی سرفہرست کورونا ویکسین نا دوئی مفننگ ءِ۔ جہانی برادری نا گام گیج آتیان داتم اسکان کم کٹیا کروک ملک آتا 20 درسد آبادی کن ہی ویکسین ہلنگ مریک۔ ہنداوڑ داملک آتون وسیلہ غاتا کمتی نا سوب آن چندی تنکی تیٹی ودکی خڑچ آتے کن فنڈ آتا دوئی مفننگ ہم اسہ ویل اسے۔ داکان بیدس چندی ویل آتا چٹفنگ کن پوسکن آ فنڈ آتا دوئی کننگ آن دا ملک آتا وام تا کچ اٹی بھاز زیات ودکی نا گڑتی ہم ارے۔ آئی ایم ایف جہانی برادری آ زور شاغاکہ نیزگار و کم کٹیا کروک ملک آتا بنداوی ویل آتا چٹفنگ کن مربوط حکمت عملی نا رداٹ زیات آن زیات فنڈ آتا دوئی کننگ ءِ پک کننگے۔
