راولپنڈی۔ 07اپریل (اے پی پی) نیشنل یونیورسٹی آف میڈیکل سائنسز(نمز) ترکش ایج یونیورسٹی نا شریداری اٹ خیبرپختونخوا و بلوچستان نا علاقہ غاتے ٹی مروک آ جلدی مرض لیشمانیاسز نا تشخیص و درمان نا بارواٹ اِراسالہ اسیجائی پٹ وپولی ڈٹ آ کاریم نا بناءِ کریر۔ نمز یونیورسٹی نا وائس چانسلر لیفٹیننٹ جنرل (ر) سید محمد عمران مجید ہلال امتیاز(ملٹری) دابابت پارے کہ پاکستان اٹی باسن ڈیہہ نا نظرانداز مروک ناجوڑی(این ٹی ڈیز) نا زرگزرانی اثرآتا بارواٹ جم وڑاٹ دُن تو بھاز کم کاریم مسنے ولے ایلو کم و نیامی کٹیا والا ملک آتا آزموندہ نا بنداو آ ننا اندازہ ءِ کہ پاکستانی راج انا بھلو کچ اس ہندا حالیت آتا اثرآتا سوب آن نیزگاری نا گواچی ءُ۔ اوپارے کہ بنجائی وزارت جان جوڑی ویکسی نیشن نا کمک اٹ ناجوڑی تا توننگ نا بابت جان جوڑی نا بشخ اٹ گڑاس سرسہبی دوئی کرینے ولے این ٹی ڈیز ءِ ہم داسرسہبی تیٹی اوار کننگ نا گرج ءِ۔ ایہن تو این ٹی ڈیز پاکستان و دنیا نا ایلو ڈیہہ تیٹی پسماندہ علاقہ غاتے ٹی مریک و دا پیلیا، ڈینگی و لیپروسی کون آ مرض آتا سوب مننگ کیک۔ نمز و ترکی ٹیکنالوجیکل ریسرچ کونسل نا اسیجائی ڈٹ انا مسدخت دا مرض انا بابت مالیکیولر شناخت و مریض نا مدافعاتی ردعمل نا جاچ ءِ کننگ ءِ۔ نمز انا بیالوجیکل سائنسز نا بشخ انا اسسٹنٹ پروفیسر ڈاکٹر شمائلہ ناز پارے کہ نمز و ایج یونیورسٹی لیشمانیاسز نا تشخیص و درمان کن اواری اٹ کاریم کننگ ءُ۔
