ریوڈی جنیرو۔ 07اپریل (اے پی پی) لاطینی امریکہ نا ملک برازیل اٹی کورونا دین آن اسہ دے اٹی ریکارڈ 4 ہزار آن زیات مرک مسنے۔ چارشنبے نادے آ امریکی میڈیا نا رداٹ پوسکن آ مرک آتیان پد برازیل اٹی ہلوک آ دین آن زوال کروک آتا کچ 3لکھ 37ہزار آن ودانے وخت اس کہ ملک اٹی ناجوڑ آتا کچ اسہ کروڑ 31لکھ اسکان سرمس۔ برازیل اٹی کورونا دین آن تدوک آ 24گھنٹہ ٹی ریکارڈ 4195بندغ زوال کرینو۔ داوخت آ کورونا نا اسہ لکھ 30ہزار پوسکن ءُ کیس مون آ بسنے۔ برازیل اٹی کورونا دین انا پوسکن آ کیس آتیان پد پک ناجوڑ آتا کچ 13104258ءِ۔ وزارت جان جوڑی نا کمامدارآتا پاننگ ءِ کہ ملک اٹی کورونا دین آن زوال کروک آتا جم کچ 337364ءِ وخت اس کہ چندی علاقہ غاتے ٹی داوخت آ کورونا دین انا 1209910فعال ناجوڑ ءُ۔ برازیل نا وزارت جان جوڑی نا حساب وکتاب نا رداٹ ملک اٹی داتم اسکان 11558784آن زیات کورونا ناجوڑ دراخ جوڑ مسنو۔ برازیل کورونا دین انا ناجوڑ آتا اعتبار اٹ دنیا نا مسٹ میکو وخت اس کہ زوال کروک آتا بابت ارٹ میکو غٹ آن زیات زہمی ملک ءِ برازیل اٹی کورونا دین آن زہمی بندغ آتا کچ اٹی پدریسہ ودکی مننگ ءِ۔ کمامدارآتارداٹ ہسپتال آتے ٹی داخلہ کن بھلو کچ اسے ٹی ناجوڑ آک بننگ ءُ و اوفک زوال کننگ ءُ، گڑاس شار تیٹی مخلوق درمان نا چاری ءُ۔ محکمہ جان جوڑی نا عہدیدار آک پاریر کہ ملک انا بھاز انگا علاقہ غاتے ٹی جان جوڑی نا نظام خراب مننگ نا دنگ آٹے۔ ناجوڑ و زوال کروک آتا کچ انا ودنگ آن پد ہم برازیل نا صدر جیئر بولسنار دین انا تالانی ءِ توننگ کن لاک ڈاؤن خلنگ نا حق اٹی اف۔ اونا موقف ءِ کہ لاک ڈاؤن آن زرگزران ءِ سرمروک آ نسخان دین انا اثرآتیان ہم بدترمریک داہیت ذکر انا قابل ءِ کہ برازیل اٹی داسال مارچ اٹی کورونا دین آن ریکارڈ 66570بندغ زوال کرینو۔
