اقوام متحدہ۔ 29 مارچ (اے پی پی) اقوام متحدہ نا سیکرٹری جنرل انتونیوگوتریش کورونا دین آن بچفنگ نا ویکسین نا کوڑی کننگ آ شون ہلوک ملک آتیا تنقید کرسا زور شاغانے کہ او کورونا نا دین انا چٹفنگ اٹ کمک کن مچ آ دنیا ٹی کورونا ویکسین نا ساف بشخنگ ءِ پک کیر۔ فرانسیسی خبررساں ادارہ نا رداٹ او تدوک آ دے تینا اسہ انٹریو اسے ٹی پارے کہ اودے دنیا ٹی کورونا ویکسین نا ساف بشخپننگ آ گڑتی ءِ۔ اوپارے کہ دنیا ٹی کورونا ویکسین نا زوت و ساف فراوانی ءِ پک کننگ ہر اسٹ نا فائدہ ٹی ءِ و داہم کہ مچ آ دنیا ٹی مخلوق کورونا دین آن بچفنگ نا ویکسین خلفینو ہرا واقعتا جہانی کہول آ الس کن گچینتکنگک۔ او آبادی نا گرج آن زیات ویکسین سپلائی نا بابت تینا فائدہ ءِ اولیت تننگ آ ہزگار ملک آتے تنقید نا شست کرسا پارے کہ ویکسین تا کوڑی کننگ نا ہچ ءُ سوب اس اف ہنداخاطرآن ننا غٹ ہزگار ملک آتیان خواست ءِ کہ او تینا گرج آن زیات ہلوک آ ویکسین تیٹی ایلو ملک آتا شریداری ءِ پک کیر ہرا گچین جہانی کمکاری نا کمک اٹ مننگ کیک۔ اوخبڑدار کرے کہ دااست ہسونی نا سوب ءِ کہ گڑاس ملک آتیٹی کورونا ویکسین ارے و گڑاس ملک آتیٹی اف و دا ہراتم مخلوق داسجفک کہ شون ہلوک ملک آتیٹی کورونا ویکسین نا دوئی آن مخلوق دا دین آن بچنگ کیک و پدتموک ملک آتیٹی اف ہراپین تباہ کن مریک۔
