حوال: سعادت خان محمد حسنی
یوم پاکستان، 23 مارچ نئے بیرہ پاکستان بلکن عالم اسلام ناتاریخ اٹ اہم ءُ دے اسے، ہراتم برصغیر نا مسلمانک اسہ نظریہ نا بنداو آ جتا ءُ وطن اسے نا جوڑ کننگ کن تاریخی قرارداد اس منظور کرسا تینا جہد نا بناءِ کریر و بیرہ ہفت سال انا وخت اٹی بے مٹ تحریک و بھلا قربانی تیان پد مملکت خداداد جوڑ مس۔ 23 مارچ 1940نا دے شکبری تیان ایڑتر مسلمانان ہند جتا ءُ قومی تشخص اسے تون تینکن اسہ مزل اسے نا تعین ءِ کریر و دامزل اسہ اسلامی فلاحی ریاست اسے نا جوڑ کننگ ئس مچ آ قوم ہروڑنا تعلقداری تے اسہ کنڈ تخسا دادے ءِ جم و جوش اٹ اڈایترہ و وطن عزیز نا غرض و مسخت آتا پوروی و بانیان پاکستان نا تغ تے پورو کننگ کن ہروڑنا پرخ و سیاسی مصلحت آن ایڑترمرسا اسہ شون ہلوک، شونہال، دفاعی لحاظ اٹ پورو سوگو ءُ مملکت اسے کن انفرادی و اجتماعی کہول آ غٹ تر کوشست آتے کاریماٹ اتنگ نا قول ءِ پوسکن کیک۔
یوم پاکستان نا بابت اسپیکر قومی اسمبلی اسد قیصر‘‘اے پی پی’’ تون گپ وتران کرسا پارے کہ 23 مارچ ننا تاریخ نا بھاز اہم ءُ دے اسے و ای سرپندمریوہ کہ دا ہمودے ءِ ہراتم نن تینا آجوئی ءِ جم و جوش اٹ اڈ ایتنہ انتئے کہ 23 مارچ آ پاکستان نا قرارداد منظور مسوسس۔ ای سرپندمریوہ کہ داسکان مزل نا دوئی کننگ سلوک ءِ ولے نن مزل نا کنڈآ ہِننگ اُن۔اسپیکر قومی اسمبلی اومیت ظاہر کرے کہ انشاء اللہ پاکستان ہمو پاکستان ضرور جوڑ مریک ہراناتغ ءِ ننا سرکڑدہ غاک خناسر و ہرا اوفتا وژن ئس۔ ساڑی حکومت خاص کر قائد اعظم ناوژن نا رداٹ تینا آخبت ءِ مون آ تخسا گام گیج کننگ ءِ۔ داوخت آ وطن نا دفاع نا سوگوی کن سلہہ بندفوج انا کڑد انا ستاءِ کرسا اوپارے کہ پاک فوج ننا ملک انا بھاز بھلو و نہادی ءُ میرات اسے و اونا پاکستان نا سالمیت و شونہالی ٹی اہم ءُ کڑداسے۔ او خاص کر ہموورناتے خراج تحسین پیش کیک ہرافک سیم تیا لمہ وطن نا دفاع نا فرض ءِ سرایترہ۔ اوپارے کہ ای سرپندمریوہ کہ یوم پاکستان ءِ پبی وڑاٹ اڈتننگے۔ اسکول، کالج و غٹ مکتبہ فکر انا مخلوق دادے ءِ اڈتننگ اٹ پبی بشخ ہلیر تانکہ معلوم مرے کہ پاکستانیک اسہ زندہ و تکڑا ءُ قوم اسے ءُ۔
وزیر مملکت پارلیمانی امور علی محمد خان یوم پاکستان نا پژدر و مسخت آتے پامدار مون آ تخسا کیہی ترند ءُ سوج ہم چست کرے۔ اوپارے کہ ننا باوہ و پیرہ پاکستان ءِ انت اکن جوڑ کریسر؟ پاکستان نا انت مطلب ئس؟ انت پاکستان ءِ ‘لاالہ الااللہ محمد رسول اللہ’ نا نظام آ اتنگ کن سہی کوشست کننگانے؟ دانا اقتصادی نظام انت مروسس؟ بیرہ عدالتی انصاف درکار ءِ یا راجی انصاف ہم درکارءِ؟ انت نن مگے جوان ءُ چین اس تیار کرین؟ انت نن مگے غلامان رسول تیار کرین؟ اوپارے کہ داہمو سوج آک ءُ ہرافتا نن بایدے ورندی ءِ ایتن، جوزہ ئی ءُ نعرہ داسہ بھاز مس۔ جوزہ ئی ءُ نعرہ آخا عملی کاریم درکار ءِ۔ ہنداخاطرآن داقوم عمران خان ءِ گچین کرینے۔ داوخت آ علی محمد خان خوداحتسابی نا گرج ءِ تالان کرسا پارے کہ 23 مارچ آ کنا ہندا کلہو ءِ کہ تینا احتساب ءِ تینٹ کین۔ سجفن انت ای دا عہدہ تون انصاف کننگ اٹی اُٹ ہراڑ آ تولوک اُٹ، ہمو زمواری تون اںصاف کننگ اُن ہرا انفرادی یا اجتماعی وڑاٹ ننا ذمہ ءُ، اوپارے کہ دا 23 مارچ آ ای سرپندمریوہ نن تینا احتساب ءِ کین کہ فرد اسے نا حیثیت اٹ ای دامملکت خداداد ءِ انت اس تسٹ ہرافتا بنداو اٹ لکھ آ مسلمان تا دتر ءِ و ہراڑکن اینو ہم سری نگر اٹ ہڑدے دتر وہینگ ءِ ہراتم او پارہ کہ نن پاکستانی اُن پاکستان ننا ءِ۔
اسلامی فلاحی ریاست نا جوڑ کننگ کن پاکستان تحریک انصاف نا جہد و سرسہبی تا ذکر ءِ کرسا وزیر پارلیمانی امور پارے کہ ای سرپندمریوہ اینو ننا غٹ آن بھلا سرسہبی دادے کہ وزیراعظم عمران خان ‘‘اسٹیٹس کو’’ نا برخلاف ڈڈ سلوک ءِ، بلاشبہ الس نا بھازانگا ویل آک ءُ دُن کہ کبینی نا ویل ءِ ہرانا وزیراعظم عمران خان ءِ ہم جوانی اٹ احساس ارے، ولے کنا مون آ ننا غٹ آن بھلا کارنامہ دادے کہ دا ملک اٹی وڈی خوری ءِ ایشواس کرین، داملک اٹی ظلم و تینائی گری نا برخلاف اسہ جماعت اس بش مس، اوپارے کہ تحریک انصاف اسہ بیانیہ سے آ سلیس کہ اگہ داملک ءِ مون آ دروئی ءِ تو میرٹ آ، انصاف آ، احتساب آ مون آ دروئی ءِ۔ نن اخس عمل کرین دانا فیصلہ ءِ وخت کیک ولے عمران خان اسہ بیانیہ اس بش کرے، نیامی تپہ، نیزگار بندغ آتے زبان تسنے کہ اگہ نیتون ظلم مننگ ءِ، ناانصافی مننگ ءِ تو بش مہ، تینا حق اکن بش مر و ہنداخاطرآن عمران خان دامیدان اٹ تنیا سلوک ءِ اونا ‘‘اسٹیٹس کو’’ تون ہچ ءُ تعلق اس اف وخت اس کہ ایلو سلوک 11، 12 جماعت آتا راہشونک اسٹ مسنو۔ دا خوارہ کہ بس انا دامون ایمون کِسہ پیری کنسا کے ہراوڑ 70 سال آن پیری کُننگ ءِ۔ اوپارے کہ کنا پیرہ پیر محمد خان آل انڈیا مسلم لیگ نا ادنیٰ ءُ کارندہ اس ئس، داسہ اونا نواسہ ءِ اللہ موقع تس کہ اگہ پیرہ ملک ءِ جوڑ کننگ اٹ بشخ ہلک تو نن ملک ءِ بچفنگ کن پیش تمانن ببو نن غٹ اواری اٹ دادے بچفن، تحریک پاکستان نا فکر ءِ زندہ کین۔
امیر جماعت اسلامی پاکستان سراج الحق پارے کہ انسانی تاریخ اٹ پاکستان ناجوڑ مننگ بھاز بھلو واقعہ اسے و مدینہ منورہ نا اسلامی ریاست آن پد دنیا ٹی دا ارٹ میکو ریاست ءِ ہرا خاص وڑاٹ نظریہ نا بنداو، فلسفہ نا بنداو آ جوڑ مسنے و 23 مارچ نا قرارداد داٹی اہم ءُ مزل نانشان اس ئس و بھاز خلوص اٹ مخلوق اسہ جہد اسے نا بناءِ کریر و اسہ چنکو وخت اسے ٹی اوفک تغ ءِ پورو کریر، کانود نا بالادستی، عدل و انصاف نا حکمرانی قائد اعظم محمد علی جناح نا بنداوی قول ونعرہ ئس ولے افسوزناک وڑاٹ 74 سال گدرینگ انگ آن پد ہم نن دا مزل ءِ دوئی کننگ کتون۔ امیر جماعت اسلامی داہیت آ زور شاغا کہ اسہ حقی اسلامی و شونہال پاکستان نا خاطر قائد اعظم محمد علی جناح و علامہ اقبال نا وژن نا خاطر ننے جہد کروئی ءِ و پوسکن آ چین ءِ پاکستان ءِ جوڑ کننگ نا مسخت آتیان معلومدار کننگ ءِ و اسہ ہندن ءُ ریاست اس ہرا اسلامی ہم مرے، شون ہلوک و شونہال ریاست اس ہم مرے تانکہ نن دنیا کن ماڈل و روشنائی ناکنگرہ جوڑ مننگ کین۔ سراج الحق پارے کہ 74 سال آن ‘‘اسٹیٹس کو’’ ءِ، اینو نوٹ انا شرف ءِ و وونٹ اناشرف اف و ہراڑتون پیسہ ارے او ایوان اٹ بریک و پیسہ نا بنداو آ ہرافک ایوان اٹ بریرہ اوفک حکومت ءِ تینا فائدہ غاتیکن کاریم اٹ اتیرہ قوم اکن آخا۔ اوپارے کہ پوسکن آ چین آن ننا ہندا خواست ءِ کہ تینافرض ءِ ادا کبو و اللہ نا مبو و اوکان پد ملک پاکستان کن کاریم کبو۔
پاکستان پیپلزپارٹی نا راہشون و مسکوہی وزیرداخلہ سینیٹر رحمان ملک پارے کہ 23 مارچ 1940نادے آن و آجوئی دوئی کننگ آن پد ہراوڑاٹ نن مونی ہنانہ، قوم ءِ اومیت ئس کہ سیاستدان، سرکڑدہ بندغ، دانشور آتون اوار راج انا ہر مکتبہ فکر ہنداوڑاٹ مون آ کاہک ہراوڑ قائد اعظم محمد علی جناح رغاماسس، بدبختی اٹ ننا دا پیش گامی ٹی ہمو رفتار سلتنے۔ ای اومیت کیوہ کہ ہموقربانی ہراپاکستان ءِ جوڑ کننگ اٹ تننگا بیرہ اوفتے مون آ تخسا ہر پاکستانی ملک اکن کاریم کے۔ کنادعا ءِ کہ نن بیرہ جمہوریت نا ٹوپ ءِ بینپن بلکن ہمو کاریم تے کین ہرافتا جمہوریت اصل اٹ ننے آن خواست کیک۔ اوپارے کہ نن مونجا مفن،خواری کین تینا لائحہ عمل اس پٹن، اوڑآکاریم کین تو اللہ ننا کمک ءِ کیک۔ رحمان ملک حکومت آ زور شاغا کہ بروک آ چین خاص وڑاٹ بے روزگار ورناتا گچینی کن وڑوڈول اس کشنگے۔ اوفتا است ءِ جم کننگ کن کاریم کننگے انتئے کہ اگہ دا ورناچین کاریم کپک تو پاکستان شون ہلنگ کپک۔
سینیٹ نا قائمہ کمیٹی دفاعی پیداوار نا چیئرمین لیفٹیننٹ جنرل (ر) عبدالقیوم پارے کہ اللہ تعالیٰ تینافضل و کرم اٹ ننے اسہ آجو ءُ ملک اس تس و دااسہ بھاز بھلو نمعتِ خداوندی اسے ہرا 27 روچہ مبارک نا آخیریکو عشرہ ٹی ملا۔ اوپارے کہ دا اتفاق الوکہ دا اللہ نا انتخاب ئس نن بھاز گڑا دوئی کرینن ولے تینا لاپرواہی تا سوب آن ہموگڑاتے دوئی کننگ کتون ہرافتے کروئی ئس۔ پوسکن آ چین ءِ داسما اف کہ برصغیر نا بشخنگ آن مست مسلمان تا حالیت انت ئس ولے داسہ کم از کم اوداتو خننگ کیرہ کہ اینو ہندوستان نا تہہ ٹی مسلمان تا انت حالیت ءِ۔ اوداہیت آ زور شاغا کہ بھلاقربانی تیان پد دوئی مروک آ آجوئی نا رکھ اکن ننے جندانا قربانی تروئی مریک، ننے مونی ہروئی مریک، ننے تینا اَنا غان بڑزا ہروئی مریک، اوپارے کہ سیاسی سرکڑدہ غاتے اسہ ایلو نا ہم کوپہ چلینگوئی مریک۔ چائے او حکومت اٹی ءُ یا اپوزیشن اٹی ءُ، ورکنگ ریلیشن شپ ضرور مرے، ای داہم پاننگ خواوہ کہ یکجہتی،اتفاق مرے، میرٹ آمخلوق ءِ قومی اسمبلی، سینیٹ نا ٹکٹ تننگے تانکہ ہموفک مون آبریر ہرا گچین کارکڑد نادرشانی و ملک وقوم اناخذمت ءِ کننگ کیر۔
لیفٹیننٹ جنرل (ر) عبدالقیوم پارے کہ ننا بحیثیت پاکستانی دا است خواہی ءِ کہ حکومت آک بریر، پنچ سال چلینگر، دہ سال یا پانزدہ سال چلینگر، تسلسل مرے او ڈیلیور کیر۔ اوپارے کہ ای پاکستان یوتھ پارلیمنٹ نا گچین مروک ءُ راہبراسے اُٹ و ہر چارآ صوبہ غاتیٹی نن اسمبلی جوڑ کرینن، یوم پاکستان آ ای بقول علامہ اقبال، اوفتے ہندا پاوہ
‘‘توراہ نوردشوق ہے منزل نہ کرقبول
لیلیٰ بھی ہم نشین ہوتو محمل نہ کر قبول’’
اوپارے کہ ورناک مون آ بریر، است ءِ چنک کپس، اوآخبت نا سرکڑدہ غاک ءُ، سوگوایمان، ہمت و جیرت نا درشانیءِکیر تو سرسہب مریرہ۔
السی نمائندہ، چندی مکتبہ فکرانا شخصیت و سیاسی جماعت آتا سرکڑدہ غاتاسلاہ ءِ مون آ تخسا پک پاننگ مریک کہ بلاشبہ پاکستانی قوم چندی بشخ آتیٹی پیداور ءُکاریم سرتسنے ولے پاکستان نا جوڑ مننگ نا مسخت آتا دوئی کننگ و لمہ وطنءِ حقی وڑاٹ اسلامی ریاست اس جوڑ کننگ کن اسہ وار ولدا23 مارچ 1940 کون آ جم و جوش بیدار کننگ نا گرج ءِ و ننے غٹ ءِ اسہ قوم ، اسہ مزل نا وفا نا قول ءِ پوسکن کرسا ملک و قوم انا خذمت ءِ کروئی مریک۔
