اقوام متحدہ۔ 16 مارچ (اے پی پی) اقوام متحدہ نا سیکرٹری جنرل انتونیوگوتریش زالبول آتا برخلاف بیدادی ءِ توننگ نا خواست کرسا پارینے کہ کورونا نا دین اٹی زالبول آتے بے روزگاری، جنسی بیدادی و کم وئی ٹی برام کون آ چیلنج آتا نرینہ غاتا نسبت زیات مون تروئی تما۔ فرانسیسی خبررساں ادارہ نا رداٹ او تدوک آ دے اسٹیٹس آف ویمن نا اقوام متحدہ نا کمیشن (سی ایس ڈبلیو) نا 65 می سالانہ دیوان آن تران کرسا پارے کہ کورونا نا دین اٹی نرینہ غاتا نسبت زالبول آتے جنسی بیدادی، چناتا برام و ملازمت آتیان محروم کون آ ویل آتا زیات مون تروئی تمانے۔ اوحکومتی سرکڑدہ ئی ٹی صنفی بریبری آ زور شاغسا پارے کہ زالبول آتا بریبر اواری اسہ گیم چینجر اسے نا حیثیت تخک ہرانا ننے گرج ءِ۔ اوپارے کہ دنیا نا بیرہ 22 ملک ہندن ءُ ہراڑے حکومت یا سرکڑدہ نا سروک زالبول ءُ و حکومتی کہول آ صنفی بریبری نا ساڑی آ کچ انا رداٹ 2150اسکان ہدف آتا دوئی کننگ مننگ کپک و داہیت ءِ ہم گوجالنگ مفک کہ مست آنبار بروک آ 130 سال اٹی ہم نرینہ ءِ فیصلہ کننگ نا اختیار مریک۔ اوپارے کہ نن تینا دفاع و رکھ اکن سلہہ یا سلہہ غاکھرب آ ڈالر خڑچ کینہ وخت اس کہ دنیا ٹی ہر 3مسٹ آن اسہ نیاڑی اسے بیدادی مون تروک ءِ ولے نن زالبول آتیا مروک آ بیدادی نا توننگ کن ہچ ءُ گام گیج اس کپننگ اُن ہنداخاطرآن ننے دانا برخلاف المی گام گیج کننگ نا گرج ءِ و زالبول و مسن تا برخلاف بیدادی نا برخلاف اقوام متحدہ نا 193 باسک آتے ہلہلہ ئی پلان آ عملدرآمد کروئی مریک۔ اقوام متحدہ ٹی اسٹیٹس آف ویمن کمیشن نا ہر سال 15 آن 26 مارچ اسکان دیوان اڈ ہلیک ہراٹی ہزار آ زالبول مچ آ دنیا ٹی زالبول آتے مون تروک بیدادی، جنسی بدسلوکی، بے بریبری و ایلو ویل آتیا شرہ کیرہ ولے اینخو نا سال کورونا نا دین انا سوب آن دا ورچوئل دیوان مریک۔
