نیویارک۔ 11 مارچ (اے پی پی) اقوام متحدہ نا اقتصادی و راجی کونسل نا سروک و پاکستانی سفیر منیر اکرم جنرل اسمبلی نا صدر وولکان بوزکیر تون اوڑدہی کرے ہراٹی او اقتصادی و راجی بشخ آتا سرجزآتے گچین کننگ نا بابت چندی امور نا بارواٹ گپ وتران کرے۔ چارشنبے نادے آ تینا اسہ ٹویٹ اسے ٹی وولکان بوزکیر پارے کہ دا اوڑدہی نا مسخت کورونا نا دین اتون مون تروک آ چیلنج آتیان پد ہم اقتصادی و راجی کونسل نا کاریم تے ہم گرنچ و اوفتا گچین مننگ ءِ پک کننگ ءِ۔ وولکان بوزکیر پارے کہ اودے اقتصادی و راجی کونسل نا سروک و پاکستانی سفیر منیراکرم نا رابطہ کاری نا چرجوئی ٹی مروک آ دااوڑدہی آن بھلو خوشی اس مسنے۔ سفیر منیر اکرم تینا ٹویٹ اٹی پارے کہ جنرل اسمبلی نا صدر وولکان بوزکیر تون اوڑدہی بھاز گچین مس و نن جنرل اسمبلی و اقتصادی و راجی کونسل نا اسیجائی ایجنڈا انگا کاریم و غرض و مسخت آتا دوئی کننگ نا عزم انا درشانی ءِ کرین۔
