نیویارک۔ 04 مارچ (اے پی پی) پاکستان چین ءِ اقوام متحدہ نا پک کروک شیڈول آن 10 سال مست نیزگاری ءِ چٹفنگ نا ہدف ءِ دوئی کننگ آمبارکبادی ترساپارے کہ چین نا نیزگاری نا برخلاف پورو سرسہبی بھاز بھلو کارنامہ اسے۔ اقوام متحدہ ٹی پاکستان نا آخبتی مندوب منیر اکرم تدوک آ دے اقوام متحدہ ٹی چینی مشن نا کنڈآن ’’چین اٹ نیزگاری نا چٹفنگ: پائیدار شونداری کن 2030ء نا ایجنڈا غا عملدرآمد‘‘ نا سرحال آ ورچوئل دود آن تران کرسا پارے کہ تاریخ اٹ داوڑ مہالو اسُل متنے کہ ملک اسے ٹی 35 سال انا وخت اٹ 770 مین بندغ ءِ نیزگاری آن کشنگے۔ اوپارے کہ ورلڈ بینک انا حساب وکتاب آن پاش مریک کہ 1970نا دہائی نا ایسری آن چین داوخت اٹی نیزگاری ٹی جہانی کہول آ 70 درسد آن زیات کمتی کن اہم کڑد ادا کرے۔ ہرا کنا خیال اٹ نیزگاری نا چٹفنگ کن چین نا بھازبھلو سرسہبی اسے و داآخا بلکن چین انسانی حق، راجی و پائیدار شونداری ءِ ہم مون آ درینے۔ اوچین نا نیزگاری ءِ چٹفنگ نا کوشست آتا رداٹ پاکستان نا وزیراعظم عمران خان نا بیان نا حوالہ ءِ تس ہراٹی او پاریسس کہ پدتموک ملک آتیکن نیزگاری نا چٹفنگ کن چین نا آزموندہ غان راہشونی ہلنگ مریک۔ پاکستانی مندوب منیر اکرم پارے کہ دُن کہ چینی صدر ژی جن پنگ پارے کہ چین نا بیلٹ اینڈ روڈ و اونا فلیگ شپ چین اقتصادی راہداری (سی پیک) ڈٹ پاکستان و چین نا اسیجائی شونہالی نا درور ءِ۔ اوپارے کہ ننے ننا نیزگاری نا چٹفنگ کن ہرکہول آ دوہری قومی کوشست و جہانی کمک درکار ءِ و انسانیت نا گچین اسیجائی آخبت کن کوشست کروئی مریک۔ پاکستانی مندوب نا تران آن پد چینی سفارتکار زانگ تینا اسہ ٹویٹ اسے ٹی پارے کہ نیزگاری نا چٹفنگ غٹ آن بھلا انسانی حق ءِ و چین اٹ نیزگاری نا چٹفنگ نا ہدف ءِ دوئی کننگ چینی الس جم کوشست و چین نا سوگو سیاسی سرکڑدہ غاتا نتیجہ ءِ۔ اوپارے کہ چین اقوام متحدہ نا پائیدار شونداری ہدف آتا مون آ دننگ کن پاکستان تون اواری اٹ کاریم کیک۔ یات سلے کہ چین نا صدر ژی جن پنگ25 فروری آ پڑو کریسس کہ چین نیزگاری نا برخلاف جنگ اٹ پورو سرسہبی دوئی کرینے۔
