راولپنڈی۔ 25 فروری (اے پی پی) پاکستان و بھارت نا ڈائریکٹر جنرلز آف ملٹری آپریشنز نا نیام اٹ ہاٹ لائن رابطہ مس ہراٹی کنٹرول لائن آ جنگ بندی معاہدہ غا سختی اٹ عملدرآمد آ امنا کننگا۔ آئی ایس پی آر نا رداٹ پاک بھارت ڈی جی ایم اوزنا ہاٹ لائن آ رابطہ ٹی ایل او سی و ایلو غٹ سیکٹر آتا حالیت آتا جاچ ءِ ہلنگا، ہڑتوم آ کنڈآتا نیام اٹ ہمو کورایشوو گڑتی تا ایسر کننگ آ امنا کننگا ہرا امن ءِ زہمی و تشدد اٹ ودکی نا سوب مننگ کیرہ۔ پاک بھارت ڈی جی ایم اوز نا گپ وتران خوشگوار چاگڑد اٹ مس ہراٹی کنٹرول لائن و ایلو غٹ سیکٹر آتیٹی جنگ بندی نامعاہدہ و مفاہمت آتیا سختی اٹ عمل کننگ نا عزم انا درشانی ءِ کننگا۔ ہڑتوم آ کنڈآتیان ہاٹ لائن رابطہ غاتے برجاتخنگ آ ہم امنا کننگا و غیر متوقع حالیت و غلط گمانی تے بارڈر فلیگ میٹنگ آتا کمک اٹ ایسر کننگ آ امنا کننگا۔ داہیت ذکر انا قابل ءِ کہ فروری 1987ء ٹی پاک۔بھارت نا ڈی جی ایم اوز نا کہول آ ہاٹ لائن رابطہ قائم مس۔ 2003ء ٹی ہڑتوم آ ملک آتیٹی کنٹرول لائن آ سیز فائر لائن نا بابت مفاہمت مس ہرانا 3 بنداوی ٹک ءُ۔ اولیکو ٹک ڈیفنس کنسٹریکشن نا بابت ءِ ہرانا رداٹ کنٹرول لائن آ 500 میٹر نا دنگ اٹ پوسکن ءُ ڈیفنس کنسٹریکشن مفک البتہ دفاعی پوزیشن تا مینٹیننس کننگ مریک۔ ہر ڈیفنس ورک ءِ بناکننگ آن مست ہڑتوم آک اسہ ایلو ءِ معلومدار کیرہ۔ ارٹ میکو ٹک سم کاری نا بابت ءِ ہرانا رداٹ اسہ ایلو نا چوکی نا ڈائریکٹ انگیجمنٹ آن پاناد کننگک۔ مسٹ میکو ٹک فلیگ میٹنگ یا ہاٹ لائن رابطہ نا بابت ءِ ہرانا رداٹ کنٹرول لائن آ ہر ایشو ءِ ایسر کننگ کن ہڑتوم آک لوکل کمانڈرز نا کہول آ فلیگ میٹنگ نا خواست کننگ کیرہ۔ ایشوسے نا بابت وضاحت درکار مرے تو فلیگ میٹنگ یا ہاٹ لائن نا کمک اٹ وضاحت خواہنگ مریک۔ پاکستان و انڈیا نا نیام اٹ 4 جتا وڑنا بارڈرز ءُ ہرافتے ٹی انٹرنیشنل بارڈر 2100.5 کلومیٹر، ایل اے سی 101.3کلومیٹر، لائن آف کنٹرول 767.4کلومیٹر و ورکنگ باؤنڈری 202کلومیٹر آ محیط ءُ۔ 2003آن داتم اسکان 13627وار لائن آف کنٹرول نا خلاف ورزی کننگا ہراٹی 310 شاری شہید وخت اس کہ 1602 ٹھپی مسر۔ 2003آن 2013اسکان 1062وار لائن آف کنٹرول نا خلاف ورزی ءِ کننگا۔ ہراٹی 14 شاری شہید و 112 ٹھپی مسر۔ 2014ء آن خاص وڑاٹ جنگ بندی معاہدہ نا خلاف ورزی ٹی نمان ودکی مس۔ 2014 آن 2021ء جنگ بندی معاہدہ نا 12565خلاف ورزی مس ہراکہ 92 درسد زیات ءُ۔ اینخو سال بیرہ 2 تُو اٹی جنگ بندی معاہدہ نا 253وار خلاف ورزی مس ہراٹی 8 شاری ٹھپی مسر۔ تدوک آ 4 سال اٹی 49 زالبول شہید، 313ٹھپی مسر وخت اس کہ 36 کودک چنا شہید و 223 ٹھپی مسر۔ 2019ء ٹی غٹ آن زیات 3351 سیز فائر لائن نا خلاف ورزی مس وخت اس کہ 2018 ء ٹی غٹ آن زیات 377 شہادت مس۔
