اسلام آباد۔ 25 فروری (اے پی پی) بنجائی وزیر حوالکاری و شینکاری سینیٹر شبلی فراز پارینے کہ ن لیگ مستین اٹ مدام دھاندلی و فراڈ اٹ گچین کاری تے مینیج کرے، اپوزیشن نا دلیل(ن) لیگ نا پسماندہ ذہن نا ڈیک ءِ، داسرپند کینہ گچین کاری تے کٹنگ نا پیدائشی حق ہم ہندافک تخرہ، ہرااعتراض آتے ہرفنگا او (ن) لیگ نا مائنڈ سیٹ آ مبنی ئسر، اپوزیشن نا وکیل نا دلیل آتیٹی ہچ ءُ شاہدی اس الوکہ، 2013ء و اینو نا الیکشن کمیشن اٹ پرخ ارے، دامخلوق نا ضمیر ءِ ہلنگ کن پیسہ خلیرہ، اپوزیشن ءِ منافقانہ رویہ غا قوم ءِ ورندی تروئی مریک۔ داخیال آتا درشانی ءِ او پنچ شنبے نادے آ وزیراعظم نا خصوصی کمکار عثمان ڈار و پی ٹی آئی راہشون علی اسجد ملہی تون اوار الیکشن کمیشن نا پیشن میڈیا تون گپ وتران کرسا کرے۔ بنجائی وزیر حوالکاری و شینکاری پارے کہ الیکشن کمیشن اٹ دوران سماعت اپوزیشن نا وکیل مفروضہ غاتا بنداو آ اعتراض ہرفے، داگچین کاری تے کٹنگ ءِ تینا پیدائشی حق سرپند کیرہ، اوفتا دلیل آتیٹی نئے شاہدی اس ئس و نئے دلیل اس۔ اوفک ہراٹک آتے ہرفیر اوڑآن مسلم لیگ (ن) نا مائنڈ سیٹ انا ڈیک مریک۔ اوپارے کہ مسلم لیگ (ن) مستین اٹ مدام دھاندلی و فراڈ نا کمک اٹ گچین کاری تے مینج کرے۔ داگچین کاری تیٹی ہرگڑا ءِ روا سرپند کیرہ۔ بنجائی وزیر پارے کہ کس انا است خواہی تیا مچ آ حلقہ ٹی گچین کاری تے کرفنگ مفک، ہراپولنگ اسٹیشن تیا اعتراض اف تو ہموڑے گچین کاری دُوارہ انت اکن کرفنگے۔ گچین کاری الس نا خراج نا پیسہ غاتیان مریک۔ بنجائی وزیر پارے کہ نن گچین کاری دھاندلی نا برخلاف 2013ء آن تینا جہد نا بناءِ کرین۔ ہمووخت نا الیکشن کمیشن و اینو نا الیکشن کمیشن اٹ پرخ ارے، اینو الیکشن کمیشن آ ہچ ءُ دباؤ اس اف، دا وتواجہ ءُ ادارہ اسے۔ اوپارے کہ مسلم لیگ (ن) 20 حلقہ غاتیٹی ری پولنگ نا پارے، وزیراعظم اوفتا چیلنج ءِ امنا کرے، داسہ اوفک تینا موقف ءِ بدل کننگ نا بناءِ کرینو۔ اوپارے کہ پی ڈی ایم اٹ ہم دافتے خننگاکہ وار وار موقف ءِ بدل کننگا و تینا ہی بیانیہ نا نفی ءِ کننگا۔ اوپارے کہ داسہ ہمورویہ ءِ اوفک الیکشن کمیشن اٹ تینا کرینو۔ اوپارے کہ ہراگچین کاری تیٹی دافک کٹفرہ اوٹی دادھاندلی کن غوغاکیرہ، دامن پسند ءُ فیصلہ خوارہ، عدالت و الیکشن کمیشن آن ہرافیصلہ اوفتا حق اٹ برے او سہی و ہرااوفتا برخلاف مرے او غلط۔ دا تینا منشا نارداٹ فیصلہ خوارہ ولے داکل متکن آ پاکستان اٹ مسکہ۔ پوسکن آپاکستان اٹ داڑ مفک۔ اوپارے کہ وزیراعظم عمران خان نا ایمان ءِ کہ داملک اٹ جمہوریت ءِ سوگو کننگ، ملک ءِ شونہال کننگ و گچین کاری تے شفاف کننگ ءِ۔
