اقوام متحدہ۔ 23 فروری (اے پی پی) پاکستان ماحولیات نا جہانی دے آ یو این ڈیکیڈ آن ایکو سسٹم ریسٹوریشن 2021-2030ء نا باقاعدہ دود انا بناء نا میزبانی ءِ کیک ہراڑآ اقوام متحدہ نا ماحولیاتی پروگرام (یو این ای پی) نا ایگزیکٹو ڈائریکٹر انگرایڈرسن داگام گیج آ پاکستان نا منت واری ءِ ہرفینے۔ 5 جون آ ماحولیات نا جہانی دے آ یو این ای پی نا شریداری اٹ اقوام متحدہ نا ماحولیاتی نظام نا بحالی نا دہائی نا باقاعدہ بنامریک۔ یو این ای پی نا ایگزیکٹو ڈائریکٹر جاری اسہ بیان اسے ٹی پارے کہ پاکستان اقوام متحدہ نا ماحولیاتی نظام نا بحالی نا جہانی کہول آ میزبانی ءِ کیک۔ ماحولیات نا جہانی دے ءِ اڈتننگ نا مسخت ودوک آ انسانی آبادی، سمندری کچٹی، گلوبل وارمنگ و جنگل آتا چٹفنگ آن ودی مروک آ ماحولیاتی ویل آتا توننگ نا بابت جہانی کہول آ شعور تالان کننگ ء، و اینخو سال دا دے ءِ قدرتی چاگڑد نا مون آ دننگ تون ماحولیاتی نظام نا بحالی نا وڑاٹ اڈتننگک۔ وزیراعظم نا خصوصی کمکار ماحولیاتی بدلی ملک امین اسلم پارے کہ یواین ای پی نا کنڈآن ماحولیات نا جہانی دے آ اقوام متحدہ نا ماحولیاتی نظام نا بحالی نا دہائی 2021-2030ء نا دود انا میزبانی کن پاکستان ءِ گچین کننگ شرف نا سوب ءِ۔ اوپارے کہ وزیراعظم عمران خان نا کماشی ٹی ماحولیاتی بدلی نا برخلاف حکومتی گام گیج آتا جہانی کہول آ امنائی ءِ۔ نیویارک اٹ اقوام متحدہ ٹی پاکستان نا آخبتی مندوب منیر اکرم پاکستان نا ماحولیات و قدرتی چاگڑد نا رکھ اکن پاکستان نا بدل مفروک عزم انا درشانی ءِ کرینے۔ اوپارے کہ کورونا نا دین و ماحولیاتی بھسکاری ننکن داہیت انا حقیقت نا ڈیک ءِ کہ نن دا چرجوئی ٹی پائیدار گام گیج کتنن و متحرک، بریبر و چاگڑد دوست زرگزران اٹ زرکاری ٹی ودکی نا وخت بسنے۔ اوپارے کہ پاکستان تینا ماحولیاتی بحالی نا نظام نا بحالی نا کمک اٹ چاگڑد دوست گام گیج آتیا عملدرآمد ءِ پک کننگ نا عزم کیک و دا کوشست آتیٹی جہانی برادری ہم پاکستان تون ضرور اوار مرے۔
