واشنگٹن۔ 16 فروری (اے پی پی) بحرین نا زرگزران اٹ کوویڈ۔ 19 نا دین آن پد پدریسہ گچینی بننگ ءِ و داسال اونا اقتصادی بحالی نا گمان ءِ۔ اینخو سال بحرین نا زرگزرانی شرح نمو 3.3 درسد مریک۔ دا خلیجی ریاست نا زرگزران نا بارواٹ دا پیشن گوئی ءِ جہانی مالیاتی فنڈ (آئی ایم ایف) کرینے۔ بحرین ءِ تدوک آ سال اٹی کورونا نا دین و جہانی مارکیٹ اٹی تیل انا نہاد آتیٹی کمتی نا سوب آن بجٹ نسخان نا مون تروئی تمانے۔ آئی ایم ایف نا پاننگ ءِ کہ 2020ء ٹی بحرین نا بجٹ نسخان جم قومی پیدوار نا 18.2 درسد ئس۔ 2019ء ٹی دا نسخان 9 درسد ئس۔ آئی ایم ایف نا رداٹ بحرین نا وامک جی ڈی پی نا 133 درسد نا بریبر مسنو۔ 2019ء ٹی سرکاری وامک جی ڈی پی نا 102 درسد ئسر۔ جہانی فنڈ بیان اٹی پارینے کہ بحرین نا اسہ بھلو وخت اسے آن برجا مالی بے بریبری نا چٹفنگ کن نیامی مد انا فریم ورک و مالیاتی ایڈجسٹمنٹ نا گرج ءِ، داکان بیدس حکومت ءِ میکرواکنامک سوگوی نا بحالی نا ہم گرج ءِ۔ جہانی ادارہ نا پاننگ ءِ کہ بحرین کوویڈ۔ 19 نا دین انا جان جوڑی نا بشخ و زرگزران آ مرتب مروک آ زہم تتون مون تننگ کن ترندی اٹ مون آ ہِننگ ءِ و کورونا دین انا ویکسین نا لس دستیابی ءِ پک کننگ ءِ۔ بحرین نا دا سال 3.3 درسد شرح نمو داہیت انا درشانی ءِ کہ غیر تیل زرگزران نا شرح نمو 3.9 درسد مننگ نا گمان ءِ۔ آئی ایم ایف بحرین نا مرکزی بینک انا کنڈآن ایلو بینک آتا کمکاری نا ستاءِ کرینے۔ اونا پاننگ ءِ کہ حکومت نا آجر ناحیثیت اٹ کڑد اٹی کمتی آن نجی بشخ ءِ زیات فعال و پرکشش وڑاٹ نجی بشخءِ جوڑ کننگ اٹ کمک رسینگک و داڑآن مالیاتی زور انا چٹفنگ اٹ کمک رسینگک۔
