اسلام آباد۔11 فروری (اے پی پی) بنجائی وزیر حوالکاری و شینکاری سینیٹر شبلی فراز سرکاری ملازم آتے تینا خڑچ آتے کم کننگ نا بابت تین تون گنڈوک جملہ غاتا تردید ءِ کرسا پارینے کہ دُن ءُ ہچ ءُ ہیت اس پاتنوٹ، سرکاری ملازم آتا روا خواست آتے بِننگ و اوفتیا پیش رفت کن تیار اُن۔ بنجائی وزیر سینیٹر شبلی فراز تینا ٹویٹ اٹی تدوک آ دے وزارت حوالکاری آ بننگ نا وخت آ مچی کروک آتون گپ وتران کروک آ ویڈیو فوٹیج ءِ ہم شیئر کرے ہراٹی سفا ہُننگ مریک کہ سینیٹر شبلی فراز گاڈی آن دڑنگ انگ آن پد جوانی اٹ مچی کروک آتا ہیت ءِ بِنگ و اوفتا ورندی ٹی پارے کہ وزیراعظم عمران خان ہڑدے ئی بنداو آ کبینی ءِ کم کننگ نا ہیت کیک و بنجائی کابینہ نا دیوان آن پد حوال اٹی ہم پاریسن کہ بنجائی ملازم آتا ویل آتے ایسر کننگ نا ہرممکن کوشست ءِ، وزیراعظم عمران خان تینٹ کفایت شعاری مہم نا بناءِ کرے و وزیراعظم آفس و ہاؤس نا خڑچ آتے کم کرے ولے سرکاری ملازم آتا ویل و مشکل آتا ایسری ننا اولیت ءِ۔ بنجائی وزیر سینیٹر شبلی فراز دا بابت تینا ٹویٹ اٹی پارے کہ افسوز ءِ داوڑنا ہیت آتے کنتون منسوب کننگا ہرافتے ای پاتنوٹ، غلط وڑاٹ ہراہیت ءِ کنتون منسوب کننگااونا داکان بیدس پین ہچ ءُ مسخت اس نظر بفک کہ غلط گمانی ودی کرسا سیاسی فائدہ دوئی کننگے۔ اومیت کیوہ کہ میڈیا دا معاملہ غا تینا زمواری تے پورو کیک۔
