اسلام آباد۔ 11 فروری (اے پی پی) وزیر خارجہ مخدوم شاہ محمود قریشی پارینے کہ نن مذاکرات نا کمک اٹ کشمیر نا ویل ءِ ایسر خوانہ، کشمیر نا ویل بھارت نا تہہ نا معاملہ اس اف، کشمیر نا ویل سلامتی کونسل نا ایجنڈاغا ساڑی ءِ۔ اوپنچ شنبے نادے آ وزارت خارجہ ٹی کشمیری تتون یکجہتی نا درشانی ءِ کننگ کن کشمیر دودوربیدہ میرات و عکسی نمائش نا دود آن تران کریکہ۔ دود آن وزیر خارجہ شاہ محمود قریشی، صدر آزاد کشمیر سردار مسعود خان و بنجائی وزیر حوالکاری و شینکاری سینیٹر شبلی فراز ئسک ہم تران کریر۔ ترانکارآک بھارت نا کنڈآن مقبوضہ کشمیر اٹی کروک آ اسہ کنڈی غیر کانودی گام گیج آن پد تدوک آ ہژدہ تُو آن برجا بدترین گھیڑ، کشمیری ورناتا جبری بے گواہی، عدالت آن ایڑتر خون تون اوار کروک آ ظلم ءِ سرجم مون آ تخار۔ دود اٹی کشمیری تتون یکجہتی نا درشانی ءِ کننگ کن کشمیری زبان اٹ ترانہ و نغمہ بنفنگا۔ سیکرٹری خارجہ سہیل محمود و وزارت خارجہ نا سینئر آفیسر آک ہم دود اٹی ساڑی ئسر۔ دود انا مسخت مقبوضہ جموں و کشمیر اٹی برجا انسانی حق انا سنگین خلاف ورزی تے تالان کننگ و کودک کشمیری تا عزم و ہمت ءِ خراج تحسین پیش کننگ ئس۔ وزیر خارجہ کشمیری تا جہد حق خودارادیت نا بابت عکسی نمائش نا بناءِ کرے۔ وزیر خارجہ دود آن تران کرسا پارے کہ مقبوضہ کشمیر اٹی کوزہ گیر بھارتی فورس آتا کنڈآن بے گناہ کشمیری تیا ظلم و انسانی حق انا خلاف ورزیک پدریسہ برجاءُ۔ اوپارے کہ مقبوضہ کشمیر تدوک آ ہژدہ تُو آن پورو فوجی گھیڑ اٹی ءُ۔ پدریسہ مواصلاتی بندمننگ، دوائی و کُن و خور انا کاختی آن کشمیری الس ءِ سخت مشکل مون تروک ءِ۔ وزیر خارجہ پارے کہ کشمیر نا ویل بھارت نا تہہ نا معاملہ اس اف۔ کشمیر نا ویل سلامتی کونسل نا ایجنڈا ٹی ساڑی ءِ۔ وزیر خارجہ پارے کہ کشمیر نا جھیڑہ ءِ اقوام متحدہ نا سلامتی کونسل نا قرارداد و کشمیری الس نا است خواہی تا رداٹ ایسر کننگ مریک۔ اوپارے کہ بھارت حق خودارادیت نا تحریک ءِ دہشت گردی تون گنڈنگ نا بے سہب کوشست کرینے وخت اس کہ بھارت نا کنڈآن ایل او سی آ جنگ بندی معاہدہ نا خلاف ورزیک پدریسہ برجاءُ۔ وزیر خارجہ پارے کہ نن مذاکرات نا کمک اٹ ویل ءِ ایسر کننگ خوانہ۔
