نیویارک، نئی دہلی، میکسیکو سٹی، ریوڈی جنیرو۔ 08 فروری (اے پی پی) مچ آ دنیا ٹی کورونا دین آن مرک آتا کچ 23 لکھ 27 ہزار اسکان سرمس وخت اس کہ چندی ملک آتیٹی ہلوک آ دین آن زہمی بندغ آتا کچ 10 کروڑ 66 لکھ آن گدرینگانے۔ دوشنبے نادے آ امریکی میڈیا نا رداٹ دنیا نا چندی ملک آتیٹی کورونا دین انا پک زہمی تا کچ 106688592 ءِ، دین آن زہمی ملک آتیٹی داتم اسکان 2327345 بندغ زوال کرینو۔ مچ آ دنیا ٹی کورونا نا فعال زہمی تاکچ 252836326ءِ، کورونا دین آن امریکہ غٹ آن زیات زہمی مسنے۔ ملک اٹی کورونا دین انا سوب داتم اسکان جم مرک آک دنیا ٹی ملک اسے آن غٹ آن زیات ءُ۔ برازیل کورونا دین آن مروک آ زوال کروک آتا لحاظ اٹ ارٹ میکو و ناجوڑ آتا بابت مسٹ میکو نمبر آٹے وخت اس کہ بھارت کورونا دین انا ناجوڑ آتا کچ انا اعتبار اٹ ارٹ میکو و مرک آتا حساب وکتاب اٹ مسٹ میکو زہمی ملک ءِ۔ امریکہ ٹی کورونا نا دین آن زہمی بندغ آتا کچ 2 کروڑ 76 لکھ آن زیات ءِ وخت اس کہ ملک اٹی دین آن مرک آک چار لکھ 75 ہزار آن گدرینگانو۔ امریکہ ٹی کورونا دین انا ناجوڑ آتا جم کچ 27611403ءِ وخت اس کہ فعال زہمی تا کچ 9782082ءِ۔ امریکہ ٹی ہلوک آ کورونا نا دین آن داتم اسکان چار لکھ 75 ہزار بندغ زوال کرینو۔ ایڑے بھارت اٹی کورونا دین انا زہمی تا کچ اسہ کروڑ 8 لکھ 38 ہزار آن گدرینگانے، ملک اٹی کورونا دین آن داتم اسکان اسہ لکھ 55 ہزار آن زیات بندغ زوال کرینو۔ بھارت اٹی کورونا دین انا جم زہمی تا کچ 10838843ءِ وخت اس کہ فعال کیس آتا کچ کم مرسا 150653 رہینگانے۔ سرکاری حساب وکتاب نا رداٹ ملک اٹی کورونا دین آن داتم اسکان 155114بندغ زوال کرینو۔ بھارت اٹی داتم اسکان 57 لکھ 75 ہزار آن زیات بندغ ءِ کورونا دین آن بچفنگ نا ویکسین خلنگانے۔ لاطینی امریکی ملک برازیل اٹی ہلوک آ کورونا دین آن مرک آتا کچ 2 لکھ 31 ہزار آن گدرینگانے وخت اس کہ مچ آ ملک اٹی ناجوڑ آتا کچ 95 لکھ 24 ہزار اسکان سرمس۔ ملک اٹی کورونا نا پوسکن آ کیس آتیان پد پک ناجوڑ آتا کچ 9524640ءِ۔ برازیل اٹی کورونا دین آن مرک آک 231561 آن ودانو، ملک اٹی داوخت آ کورونا دین انا 895892فعال ناجوڑ ءُ۔ میکسیکو ٹی کورونا دین آن مرک آتا کچ اسہ لکھ 65 ہزار اسکان سرمسنے، ملک اٹی دین آن زہمی بندغ آتا کچ 19 لکھ 26 ہزار آن زیات ءِ۔ وزارت جان جوڑی نا کمامدارآتارداٹ میکسیکو ٹی کورونا دین آن مرک آتا کچ 165786اسکان سرمسنے وخت اس کہ ہلوک آ دین انا ناجوڑ آتا جم کچ 1926080 ءِ۔ ارجنٹائن اٹی کورونا دین آن داتم اسکان 19 لکھ 80 ہزار آن زیات بندغ زہمی مسنو۔ ارجنٹائن اٹی کورونا دین انا پوسکن کیس آتیان پد ناجوڑ آتا کچ 1980347وخت اس کہ کہوک آتا پک کچ 49171ءِ۔ وزارت جان جوڑی نا کمامدارآتارداٹ ملک اٹی داوخت آ کورونا دین انا 152211فعال ناجوڑ ءُ۔
