اسلام آباد۔ 03 فروری (اے پی پی) وزیر خارجہ مخدوم شاہ محمود قریشی پارینے کہ کس ءِ کشمیر ءِ کشمیری تیان پُلنگ کن الیپنہ، دا مسخت و جہد ساف و مقدس ءِ و داڑآ ہچ ءُ سمجھوتہ اس مفک، ’ہند توا‘ نا انتہاپسندانہ سوچ نئے بیرہ کشمیری بلکن تینٹ بھارت نا شاری خاص وڑاٹ مسلمان تیکن ہم بھلو گڑتی اسے۔ چارشنبے نادے آ انسٹی ٹیوٹ آف ریجنل سٹڈیز نا کنڈآن ’’کشمیر نا ناشنیدہ توار آتون یکجہتی‘‘ نا سرحال آ سیمینار آن تران کرسا وزیر خارجہ پارے کہ بھارت نا کوزہ ٹی جموں و کشمیر اٹی حالیت آک 5 اگست 2019 ء نا بھارت نا غیر انسانی و اسہ کنڈی گام گیج آتیان پد آن پین بدتر مسنو۔ 9 لکھ آن زیات کوزہ گیر بھارتی فوج بے گناہ کشمیری تیا بدترین ظلم کننگ ءِ۔ غیر کانودی وڑاٹ بھارت نا کوزہ ٹی جموں و کشمیر اٹی جعلی’’مقابلہ‘‘ پٹنگ وچھاپہ غاتا آڑاٹ ورناکشمیری تا عدالت آن ایڑتر شہیدی معمول مسنے۔ کوزہ گیر بھارتی فوج 5 اگست 2019آن داتم اسکان 300 آن زیات بے گناہ کشمیری تے شہید کرینے۔ دختران ملت نا بانی راہشون و کشمیر نا زالبول آہن گودی آسیہ اندرابی، جموں و کشمیر ڈٛیموکریٹک فریڈم پارٹی نا بانی راہشون شبیر احمد شاہ، پنی آ راہشون یاسین ملک، مسرت عالم بھٹ، محمد اشرف صحرائی تون اوار ایلو سینئر کشمیری سرکڑدہ غاک دروغ و بدنیتی آ مبنی جعلی دوبہ غاتا رداٹ بدنام زمانہ زندان تیٹی بند ءُ۔ اوپارے کہ آر۔ایس ۔ ایس ، بی ۔جے۔پی حکومت نا مسخت بھاز ساف ءِ، مقبوضہ ڈیہہ ٹی آبادی نا تناسب ءِ بدل کننگ ناءِ ہرا اقوام متحدہ نا سلامتی کونسل نا قرارداد، جہانی کانود بشمول چارمیکو جنیواکنونشن نا اسُل خلاف ورزی ءِ۔ کوزہ گیر بھارتی فوج انا ظلم و جور و استبداد آن پد ہم کشمیریک بھارتی غلامی ءِ قبول کننگ آن انکار کریر و کشمیری تا بھارتی کوزہ گیری آن آجوئی دوئی کننگ نا عزم پین سوگو و طاقت ورمسنے۔ جموں و کشمیر بھارت نا ’’اٹوٹ انگ‘‘ اف و داپن انا بھارتی دعویٰ باطل ءِ، نئے تو داوخت اس ئس۔۔۔۔۔ و نئے وخت اس مریک۔ وزیر خارجہ پارے کہ ’ہندتوا‘ نا انتہاپسند سوچ نئے بیرہ کشمیری بلکن تینٹ بھارت نا شاری خاص وڑاٹ مسلمان تیکن اسہ بھلو گڑتی اسے۔ بی۔جے۔پی، نا بھارت اٹی مسلمان تے شست کننگ و اوفتا برخلاف متعصبانہ گام گیج ہڑدے نا معمول مسنے۔ وزیر خارجہ پارے کہ پاکستان نا بنداوی نصب العین جموں و کشمیر نا جھیڑہ ءِ کشمیری الس نا است خواہی، واقوام متحدہ نا سلامتی کونسل نا تعلقدار قرارداد آتا رداٹ اقوام متحدہ نا چاروکی ٹی اڈ ہلوک آجو، شفاف و بے کنڈ ہلوک استصواب رائے نا کمک اٹ ایسر کرفنگ ءِ۔ پاکستان نا حکومت و الس کشمیری تا منصفانہ استصواب رائے نا حق انا جہد اٹی اوفتا پبی مخ تفی ءِ برجاتخنگ ناعزم انا درشانی ءِ کینہ۔ نن کس اسے کشمیر ءِ کشمیری تیان پُلنگ نا موکل تفنہ۔ دا مسخت و جہد منصفانہ و مقدس ءِ و داڑآ ہچ ءُ سمجھوتہ اس مننگ کپک۔
