اسلام آباد۔ 03 فروری (اے پی پی) نیشنل کمانڈ اینڈ آپریشن سینٹر (این سی او سی) چارشنبے نادے آ اسہ وڑاٹ مچ آ ملک اٹی کورونا دین انا برخلاف قومی رکھی ٹیکہ غاتا مہم نا بناءِ کرے ہراٹی آزاد جموں و کشمیر و گلگت بلتستان تون اوار غٹ بنجائی اکائیک اوار ءُ۔ این سی او سی کورونا نا برخلاف قومی رکھی پروگرام نا بنائی دود ءِ بنجائی وزیر ڈٹ بندی، شونداری و خصوصی گام گیج اسد عمر و قومی کوآرڈینیٹر این سی او نا لیفٹیننٹ جنرل حمود الزمان خان نا کماشی ٹی بناءِ کننگا۔ داوخت آ کمرشل وزیر کونسلر چین ژی ژاؤژیانگ مہمان خاص ئس۔ دود اٹی بنجائی وزیر سائنس و ٹیکنالوجی فواد حسین چوہدری،وزیراعظم نا خصوصی کمکار جان جوڑی ڈاکٹر فیصل سلطان و وزیراعظم نا خصوصی کمکار نیزگاری نا چٹفنگ ڈاکٹر ثانیہ نشترئسک ہم ساڑی ئسر۔ داوخت آ تران کرسا بنجائی وزیر ڈٹ بندی، شونداری، اصلاحات و خصوصی گام گیج اسد عمر کورونا دین اٹی قوم انا خذمت کن فرنٹ لائن ہیلتھ کیئر ورکرز(ایف ایل ایچ سی ڈبلیو) نا قربانی و سفت نا قابل خذمت آتا ستاءِ کرے۔ ’’فرنٹ لائن ہیلتھ کیئر ورکر آک ننا حقی آ ہیروک ءُ۔ داٹی ہچ ءُ شک اس اف کہ اوفک کورونا دین انا برخلاف جنگ اٹ تینا جان تے خطرہ ٹی بٹیر و نن ہموغٹ ءِ خراج تحسین پیش کینہ۔ اوالسی جمہوریہ چین نا حکومت و چینی الس نا خاص منت واری ءِ ہرفے کہ اوفک کورونا نا تنکی ٹی پاکسان تون پبی تفیر۔ اوفورم اٹی کورونا نا برخلاف جنگ اٹ این سی او سی نا ٹیم و صوبائی کمامدار آتے ہم خراج تحسین پیش کرے۔ اسد عمر پارے کہ بنجاتون اوار غٹ صوبہ غاتیٹی اسہ وخت آ بنائی دود انا مسخت دادین انا برخلاف برجاجنگ اٹ صوبہ و بنجائی حکومت نا اسیجائی کمکاری ءِ تالان کننگ کن ئس۔ کورونا دین انا برخلاف رکھی ویکسین خلفوک آتیٹی رضوانہ یاسمین پاکستان انسٹی ٹیوٹ آف میڈیکل سائنسز(پمز) اٹی آئسولیشن وارڈ اٹی انچارج نرس انا حیثیت اٹ کاریم کننگ ءِ، او و اونا ٹیم کوویڈ۔ 19 نا برخلاف جنگ اکن سخت خواری کننگ ءُ و او پمز انا غٹ میڈیکل و پیرامیڈیکل عملہ نا نمائندگی ءِ کریکہ۔ داکان بیدس جاوید اقبال ہرا ڈی ایچ او آفس اسلام آباد اٹی کوویڈ سرویلینس ٹیم انا باسک ءِ ، او اسلام آباد اٹی کوویڈ۔ 19 نا اولیکو واقعہ مون آ بننگ آن پد آن چاروکی نا سرجزآتیٹی کاریم کننگ ءِ اودے ہم کورونا رکھی ویکسین خلنگا۔ او و اونا ٹیم سخت خواری کننگ ءِ و رابطہ ٹریسنگ و نمونہ ہلنگ نا کمک اٹ اسلام آباد اٹی 10 ہزار آن زیات کورونامثبت کیس آتا تشخیص ءِ کرینو۔ او اسلام آباد اٹی کورونا دین انا چاروکی نا غٹ ٹیم تا نمائندگیءِ کریکہ۔ داکان بیدس فہد محمود ہرا کورونا ٹیسٹنگ تون مون تننگ کن شفا انٹرنیشنل نا بشخ پیتھالوجی ٹی کاریم کننگ ءِ۔ شفا ہسپتال اسلام آباد اٹی کورونا دین انا بابت بھلو کچ اسے ٹی ٹیسٹ کننگ ءِ و دا دین آن زہمی ناجوڑ آتا ہم درمان ءِ کرسا کرینے۔ ہنداوڑاٹ سندھ اٹی ہیلتھ کیئر نافرنٹ لائن ورکرآتے ویکسین خلنگ نا دود سندھ انا وزیراعلیٰ مراد علی شاہ نا کماشی ٹی ڈویو نیورسٹی نا اوجھا ویکسینیشن سینٹر اٹی اڈ ہلک۔ ہنداوڑاٹ پنجاب اٹی وزیراعلیٰ عثمان بزدار نا کماشی ٹی دا دود انا بست و بند ءِ کننگا۔ خیبرپختونخوا ٹی ہم وزیراعلیٰ محمود خان نا کماشی ٹی دود اس اڈتننگا، بلوچستان اٹی وزیراعلیٰ سیکرٹریٹ اٹی وزیراعلیٰ جام کمال ناکماشی ٹی کورونا نا بابت ویکسین خلنگ نا دود انا بناءِ کننگا۔ آزاد کشمیر اٹی دادود انا بست و بند ءِ وزیراعظم سیکرٹریٹ اٹی و گلگت بلتستان اٹی چیف سیکرٹری سیکرٹریٹ اٹی چیف منسٹر گلگت بلتستان نا کماشی ٹی اڈتننگا۔
