ملتان۔ 03 فروری (اے پی پی) وزیر مملکت موسمیاتی بدلی زرتاج گل پارینے کہ ساڑی دور حکومت اٹ دنیا نا مون آ ہراوڑاٹ کشمیر ناویل ءِ تالان کننگانے مستین اٹ اونا درور ملیپک، وزیراعظم عمران خان کشمیری تا سفیر مننگ نا حق ءِ ادا کننگ ءِ، بھارتی کوزہ گیری آن آجوئی کشمیری الس نا مقدر ءِ۔ ہندوستان نا بھیانک دروشم دنیا نا مون آ پاش مسنے۔ ’’اے پی پی‘‘ تون گپ وتران کرسا وزیر مملکت پارے کہ ہمودے مر اف ہراتم کشمیریک تینا آخبت نا فیصلہ ءِ تینٹ کیرہ و پاکستان ہر کہول آ کشمیری تا سیاسی، سفارتی و اخلاقی مخ تفی ءِ برجاتخک۔ زرتاج گل پارے کہ بھارت اٹ آجوئی نا تحریک زور ہلنگ ءِ، سکھ بزغر آک تینا حق انا دوئی کننگ کن دنیا نا مون آ بھارتی حکومت نابھیانک دروشم ءِ پاش کرینو و داسہ جمہوریت نا دعویدارک بوزاٹ کُننگ ءُ۔ اوپارے کہ 5 فروری آ نن یوم یکجہتی اڈ ترسا دنیا ءِ دا باور کرفنگ خوانہ کہ اقوام عالم کشمیری تے آجوئی اٹ زند ءِ تیر کننگ نا حق ترفے۔ اوپارے کہ قائد اعظم محمد علی جناح ہم کشمیر ءِ پاکستان نا شہ رگ و وجود پاکستان کن المی گوندا ولے بھارت تدوک آ 73 سال آن کشمیرآ غاصبانہ کوزہ کرینے، بھارت کشمیر اٹی مسلمان تا گیشتری ءِ اقلیت اٹ بدل کننگ کن ظالمانہ چم آتے کاریم اٹ اتنگ ءِ، ولے 8 لکھ بھارتی فوج کشمیری تا جوزہ جہاد و شق شہیدی ءِ یخ کننگ کتو۔
