اقوام متحدہ۔ 03 فروری (اے پی پی) پاکستان پارینے کہ مشکل آتیان پد ہم پیش رفت آن پد اوغان امن عمل ءِ گوجالنگ اسہ المیہ اس مریک۔ اقوام متحدہ ٹی پاکستان نا آخبتی مندوب منیر اکرم تدوک آ دے اقوام متحدہ نا آف فاردی کوآرڈینیشن آف ہیومینیٹیرین افیئرز(اوسی ایچ اے) نا کنڈآن اوغانستان کن ہیومینیٹیرین رسپانس پلان 2021آ اقوام متحدہ نا سینئر کمامدار آتا بریفنگ سیشن نا وخت آ تینا ردعمل اٹی پارے کہ مشکل آتا سوب آن ہم امن عمل ءِ تورسا فوجی حکمت عملی نا کنڈآ پدی بننگ اسہ المیہ اس مریک۔ اوغانستان اٹی امن نا اسٹ انگا کسر سیاسی ایسر ءِ۔ اوپارے کہ وزیراعظم پاکستان عمران خان وار وار داہیت انا درشانی ءِ کرینے کہ اوغانستان اٹی بے چیٹی ءِ فوجی واک انا کاریم اٹ اتنگ آن آخا بلکن اوغانستان نا سیاسی منظرنامہ نا رداٹ سیاسی تصفیہ نا کمک اٹ چٹفنگ مریک۔ پاکستان جہانی برادری تون دا عزم انا درشانی ءِ کرے کہ ملک اسے آ جلہو کننگ یا دھڑکو تننگ کن القاعدہ، داعش و جہانی دہشت گرد رڑتے اوغانستان نا گل زمین ءِ کاریم اٹ اتنگ نا موکل تننگپ۔ اوغٹ اوغان کڑدہ غاتیا زور شاغا کہ او اوغانستان اٹی بیدادی ٹی کمتی اتنگ و امن و ایمنی کن دمدستی گام گیج کیر و داڑکن جامع سیاسی تصفیہ نا کمک اٹ بین الاوغان امن مذاکرات آن ہرا اومیت نا روشنائی دُوارہ نظر بسنے او دا تاریخی موقع غان فائدہ ہرفر انتئے کہ اوغان کڑدہ غاتے پیشن و درملکی نیام تمنگ آن بیدس تینا آخبت نا بابت فیصلہ غاتا اختیار تننگ و اوفتا کنڈآن تینا مزل نا تعین ءِ کننگ المی ءِ۔ پاکستانی مندوب پارے کہ اوغانستان اٹی امن و ایمنی نا گرج ءِ انتئے کہ درملکی مداخلت و دہشت گردی آن انسانی حالیت آتیا تباہ کن اثرمرتب مس۔ پاکستانی مندوب پارے کہ پاکستان اوغانستان اٹی شونداری کن اسہ بلین ڈالر نا وعدہ کرینے ہرافتیان 500 ملین ڈالر انفراسٹرکچر و لائخی تیٹی ودکی نا ڈٹ آتیا مہالو آن خڑچ کننگانے۔ اوپارے کہ کورونا دین و چندی ملک آتیٹی سیم تا بند مننگ آن پد ہم پاکستان نا حکومت اوغان شاری تے خاص وڑاٹ جان جوڑی نا آسراتی نا غرض آن پاکستان آ بننگ کن ویزاپالیسی آ نظرثانی کرے و داچرجوئی ٹی نن پاک اوغان سیم آ 5 پوائنٹ ملان و اوغانستان ءِ طبی ازباب عطیہ کرین۔ اوپارے کہ پاکستان تدوک آ 4 دہائی آن لکھ آ اوغان باہوٹ آتے پناہ تس و نن اوفتا تینا اُراتے رکھ و پروقار پدی ہننگ نا عزم تخنہ و داڑکن نن اوغان حکومت تون کمک کن تیار اُن۔ اوپارے کہ پاکستان 1.16 بلین ڈالر نا نیامی۔ سویلی ایشیانا توانائی ڈٹ کاسا۔ 1000(ترکمانستان اوغانستان اوغانستان انڈیا گیس پیپ لائن ڈٹ)، اوغانستان تون واپار نا مون آ دننگ تون اوار علاقائی رابطہ غاتا ڈٹ آتا پوروی کن کاریم ءِ برجاتخک و سی پیک اٹ اوغانستان نا اوار مننگ آن انفراسٹرکچر، راجی و اقتصادی شونداری نا است بڈی، نیزگاری نا چٹفنگ و علاقائی واپار اٹ گچینی بریک۔ پاکستانی مندوب منیر اکرم پاکستان نا پرامن، سوگو، متحد، جمہوری و شونہال اوغانستان و ہمسایہ ملک آتیٹی امن و ایمنی نا عزم انا درشانی ءِ کرے۔
