اقوام متحدہ۔ 29 جنوری (اے پی پی) پاکستان بھارت نا غیر کانودی کوزہ ٹی مقبوضہ جموں و کشمیر اٹی بھارت نا کنڈآن بنداوی انسانی حق انا خلاف ورزی و بربریت نا مذمت ءِ کرسا خواست کرینے کہ کشمیری تے اقوام متحدہ نا قرارداد آتا رداٹ اوفتا حق خودارادیت ءِ تننگ نا وعدہ غا عملدرآمد کننگے۔ اقوام متحدہ ٹی پاکستان نا آخبتی مندوب منیر اکرم تدوک آ دے اقوام متحدہ نا جنرل اسمبلی ٹی تنظیم نا کارکڑد آ سیکرٹری جنرل نا سالانہ رپورٹ آ شرہ کرسا پارینے کہ پوسکن و متکن آ جھیڑہ غاتا ایسری کن سفارتی کوشست آتیٹی ودکی المی ءِ۔ اوپارے کہ نوآبادیاتی نظام نا چٹفنگ نا عمل ہمووخت اسکان بے پورو مریک ہراتم اسکان مقبوضہ جموں و کشمیر نا الس سلامتی کونسل نا چندی قرارداد آتا رداٹ اقوام متحدہ نا چاروکی ٹی تینا حق خودارادیت نا کاریم اٹ اتنگ نا قابل مفسہ انتئے کہ کشمیر نا ویل انا ایسری اقوام متحدہ نا قرارداد آتیٹی ءِ۔ اوپارے کہ بھارت تینا غیر کانودی کوزہ ٹی مقبوضہ جموں و کشمیر نا الس ءِ بنداوی حق آن محروم تخنگ نا تینا ظالمانہ مہم ءِ برجاتخسا کشمیر اٹی 9 لکھ بھارتی فوجی تا کمک اٹ بھلو کچ اسے آ انسانی حق انا خلاف ورزی کننگ ءِ، ہزار آ کشمیری سیاسی راہشون تے دزگیر کننگا، ہزار آ ورناک بے گواہ ءُ، سد آ ہزار کشمیریک شہید مسر، ہزار آک ٹھپی مسر و20 ہزار کشمیری زالبول آتا عصمت دری ءِ کننگا۔ اوپارے کہ بھارت کشمیری تا توار ءِ توننگ نا کوشست کرے، لائن آف کنٹرول آ لگاتار سیز فائر نا خلاف ورزی و جارحیت نا دھڑکو آن پاکستان نا توار ءِ توننگ نا کوشست کرینے و داآخا بھارت پاکستان نا برخلاف دہشت گردی و بغاوت ءِ برجاتخسا فالس فلیگ آپریشن نا ڈٹ بندی ہم کرے۔ اوبھارت نا فروری 2019ء ٹی ڈکھوئی اٹ جلہو نا حوالہ ءِ ترسا خبڑدار کرے کہ دُن تو بھارت نا انتہاپسند حکمران جماعت بی جے پی و انتہاپسند تنظیم آر ایس ایس نا فاشٹ حکمرانی نا حامل جنونی سوچ انامخالفت اٹی ودکی مس ولے او اقتدار آ تینا غاصبانہ گرفت ءِ برقرار تخنگ کن انتس مس کننگ کیک۔ اوداہیت آ است ہسونی نا درشانی ءِ کرے کہ اقوام متحدہ نا اصول و مسخت آتا شرف اٹ نمان وڑاٹ کمتی واقع مسنے، مچ آ دنیا ٹی جھیڑہ غاتیٹی ودکی مس، جہانی واکدار آتا نیام اٹ جہانی سلہہ غاتا پوسکن آ رُمب بناکرے و داڑتون اوار اوار نیزگاری و مشکل آتیٹی ودکی مسنے۔ اوپارے کہ ساڑی تنکی دین، نیزگاری، چاگڑدی بدلی تتون مون تننگ کن المی وڑاٹ دمدستی و اسیجائی کوشست کننگ ناگرج ءِ۔ اوپارے کہ زینو فوبیا یعنی خوف و خار، نسل پرستی و انتہاپسندانہ نظریہ غاتیٹی ودکی مسنے و آمرانہ ایجنڈہ غاتے مون آ دننگ کن جمہوریت نا استحصال ءِ کننگ انگ ءِ و کورونا دین انا سوب دا رجحان آتے مون آ دننگ رسینگانے۔ اوپارے کہ کورونا دین انا برخلاف کیہی سرسہب ویکسین تیار کننگانے ولے کورونا دین نا تنکی نا مون ءِ توننگ، زرگزران نا بحالی، مخلوق نا زند ءِ بچفنگ کن جہانی کہول آ ویکسین نا تیاری وامداد نا بریبر فراوانی المی ءِ۔
