اسلام آباد۔ 22 جنوری (اے پی پی) وزیراعظم نا سلاہکار واپار عبدالرزاق داؤد پارینے کہ ساڑی حکومت نا گام گیج آتیان برآمد آتیٹی ودکی مس، کوویڈ۔ 19 نا سوب آن منہ تُو اکن برآمد آک شیف تمار، پوسکن آ برآمدی بشخ آتیا چکار کروئی مریک۔ جمعہ نادے آ ایوان بالا ٹی وقفہ سوج آتیٹی سینیٹر بہرہ مند تنگی نا سوج انا ورندی ٹی سلاہکار واپار عبدالرزاق داؤد پارے کہ 2018-19ء ٹی 23 ارب نا ایکسپورٹ ئسر، نن کوشست کرسا برآمد آتے ودفین۔ جنوری 2019ء ٹی 14 درسد ودکی مس، کوویڈ نا سوب آن اوکان پد ایکسپورٹ آک تمار۔ جون آن ولدا ودنگ نا بناءِ کریر۔ داسہ ننا برآمد آک مست آن زیات ءُ۔ سینیٹر رخسانہ زبیری نا سوج انا ورندی ٹی اوپارے کہ ٹیکسٹائل نا برآمد آک ودانو۔ ننے ٹیکسٹائل آن بیدس ہم ایلو بشخ آتے پٹوئی ءِ، آئی ٹی سیکٹر اٹ برآمد آتیٹی 40 درسد ودکی مسنے، نن کیمیکلز، فارماسیوٹیکل، آئی ٹی تون اوار ایلو بشخ آتیا چکار کننگ اُن، آئی ٹی والا تے بیرہ زرتس انا بابت آسودہی درکار ئس اوفتے ہم تسونن۔ سینیٹر عثمان خان کاکڑ نا سوج انا ورندی ٹی اوپارے کہ ڈی ایل ٹی ایل نن غٹ ءِ ایتنہ۔ ہراہم پارٹی ایکسپورٹ کے اودے اِرادرسد ملک۔ کوشست ءِ کہ ایس ایم ایز آ زیات چکار کین، ہرا بھلا پارٹیک ءُ اوفتا ایکسپورٹ زیات ءُ ہنداخاطرآن اوفتا زرتس زیات مریک۔
