اقوام متحدہ۔ 22 جنوری (اے پی پی) پاکستان اقوام متحدہ نا جنرل اسمبلی ٹی خیبرپختونخوا نا ضلع کرک اٹی ہندو مندر ءِ خاخر تننگ نا ساڑی آ واقعہ نا بابت بھارت نا بے پک مروک دعویٰ تے مسترد کرسا پارے کہ بھارت ایلوفتیا دوبہ خلنگ نا جاگہ غا تینا ملک اٹی اقلیت آتا حق آ چکار کے۔ پاکستانی مندوب ذالقرنین چھینابھارتی مندوب اشیش شرمانا دعویٰ ہراٹی او پارے کہ ضلع کرک نا کمامدار آک مندر اٹ خاخر لگنگ نا واقعہ ءِ ہرسا کریر و ہچ اس کتوس، آ اقوام متحدہ نا جنرل اسمبلی ٹی تدوک آ دے ورندی تننگ نا تینا حق ءِ کاریم اٹ اتسا پارے کہ دا اولیکو وار متنے کہ بھارت ایلو ملک اٹی اقلیت آتا حق آ گڑتی نا درشانی ءِ کرینے وخت اس کہ بھارت تینٹ اقلیت آتا حق انا غت آن زیات آخبت خلاف ورزی کروک آ ملک ءِ۔ اوپارے کہ بھارت و پاکستان اٹ پیدوار پرخ انا کساس داڑآن خلنگ مریک کرک اٹی مندر اٹ خاخر لگفوک آتے دمدستی دزگیر کننگا۔ مندر ءِ جوڑ جاڑ کننگ نا پرمان جاری کننگا، بڑزکو کہول آ عدلیہ و سیاسی سرکڑدہ غاک دا واقعہ نا نوٹس ءِ ہلکر و مذمت کریر ولے بھارت اٹی مسلمان و ایلو اقلیت آتا برخلاف امتیازی سلوک نا پاش آن پاش گام گیج کننگک و ہموڑے اقلیت آک ریاستی جور اٹ زند ءِ تیر کننگ آ بیوس ءُ۔ اودا چرجوئی ٹی بھارتی حکومت نا متنازع شہریت، بھارتی شاری تا قومی رجسٹر(این آر سی) ، 2002اٹی گجرات اٹی کشت وخون، مسلم مخالف 2020دہلی پروگرام، 1992ء ٹی بابری مسیت ءِ شہید کننگ و اونا ڈوہدار تے بھارتی عدالت نا کنڈآن بری کننگ، کورونا دین انا تالانی کن مسلمان تے دوبہ دار گوندنگ، لووجہاد و گاؤر کھشک و دیکی بنگال نا مسلمان تے پاٹ انا پُو گوندنگ و بھارت نا کوزہ ٹی مقبوضہ جموں و کشمیر اٹی بے گناہ کشمیری تا عدالت آن ایڑتر خون کون آ گام گیج آک اوار ءُ۔ اوپارے کہ بھارت نا حکمران جماعت بی جے پی و ہندوانتہاپسند تنظیم آر ایس ایس نا اقلیت و خاص وڑاٹ مسلمان تا حق انا منظم خلاف ورزی و بیدادی نا درور آتیان پُر ءِ۔ اوپارے کہ بھارتی سرکڑدہ فروری 2020اٹی دہلی قتل عام نا ڈوہدار تے اوفتے اوفتا کروک نا سزا تننگ مُر انا اونا مذمت اسکان کتو۔ پاکستانی مندوب پارے کہ ریاستی سرپرستی ٹی مروک آ دہشت گردی و امتیازی سلوک نا سوب بھارت انسانی حق انا ویل آ دعویداری حیثیت نا پوزیشن اٹی اف ہنداخاطرآن بھارت ءِ ایلوفتیا دوبہ خلنگ نا جاگہ غا تینا ملک اٹی اقلیت آتا حق آ چکار کے۔
