اسلام آباد۔ 22 جنوری (اے پی پی) وزیر مملکت پارلیمانی امور علی محمد خان پارینے کہ تدوک آ اِرا تُو اٹی قومی اسمبلی نا دیوان ءِ بٹنگ انگ کن اپوزیشن کمک کتنے، نن تینا قبلہ ءِ سہی کینہ، اپوزیشن تینا قبلہ ءِ سہی کے۔ جمعہ نادے آ قومی اسمبلی ٹی اعتراضی ٹک آ احسن اقبال پارے کہ دا ملک انا بڑزکو انگا ایوان ءِ۔ دا ایلو ادارہ غاتیکن درور نا حیثیت تخک۔ یونین کونسل نا دیوان آن مست ہم 72 گھنٹہ نا نوٹس تننگک۔ تدوک آ نن ہشت بجہ اسکان ننے سماالوکہ کہ قومی اسمبلی نا دیوان مریک۔ اونا شیڈول و کارروائی نا حرمت بایدے مرے۔ سید نوید قمر احسن اقبال نا نکتہ نظر آن امنا کرسا پارے کہ 12 گھنٹہ غان کم نوٹس آ دیوان ءِ بٹنگ انگا آخر انت داوڑءُ ایمرجنسی اس ئس۔ نن داوڑنا ہیت آتیان بایدے پاناد کین۔ داڑآن ایوان نا وقار کم مریک۔ وزیر مملکت پارلیمانی امور علی محمد خان مسلم لیگ (ن) و پیپلزپارٹی نا باسک آتا کنڈآن چست کروک ٹک آتا ورندی ءِ ترسا پارے کہ احسن اقبال جوان ءُ ہیت کرینے ولے بے گرج وڑاٹ پوائنٹ سکورنگ آن پاناد کننگے۔ ہراتم کوویڈ۔ 19 اٹی دیوان ءِ بٹنگ انگاسس تو ہمووخت آ بے گرج وڑاٹ اونا بائیکاٹ ءِ کننگا۔ نن تینا قبلہ ءِ سہی کینہ، اپوزیشن تینا قبلہ ءِ سہی کے۔ قومی اسمبلی نا دادیوان ءِ بٹنگ انگ کن چیف وہپ ملک عامر ڈوگر بھلو اہم ءُ کڑد اس ادا کرینے۔ نن کوشست کینہ کہ پین وخت اس داوڑمف۔
