نیویارک۔ 21 جنوری (اے پی پی) پاکستان اقوام متحدہ نا سیکرٹری جنرل انتونیوگوتریش آ زور شاغانے کہ او نئی دہلی نا تہاڑ زندان اٹی بند ناجوڑ جموں و کشمیر لبریشن فرنٹ نا چیئرمین محمد یاسین ملک نا رہائی کن بھارت آ زور شاغے و تینا اثرورسوخ ءِ کاریم اٹ اتے۔ اقوام متحدہ ٹی پاکستان نا آخبتی مندوب منیر اکرم تدوک آ دے اقوام متحدہ نا سیکرٹری جنرل نا پن جاری چھٹی ٹی حریت راہشون یاسین ملک نا اُرائی مشعال ملک نا تینا اَرے نا رہائی نا خواست ءِ ہم خلسا پارینے کہ مناسب عمل و رکھی گام گیج آتیان بیدس بھارت نا ظالمانہ کوزہ، واکداری، کانود و وڑوڈول اٹی زند ءِ تیر کننگ و بھارتی کوزہ نا برخلاف مزاحمت کروک آ کشمیری و سیاسی راہشون تیا بھارتی بیدادی اوفتا بنداوی انسانی حق انا بھلا خلاف ورزی ءِ۔ چھٹی ٹی مشعال ملک پارے کہ بھارتی قید اٹی حریت راہشون یاسین ملک نا جان جوڑی بھاز خراب ءِ و پدریسہ جسمانی و ذہنی بیدادی آن اونا حالیت بھاز خراب مسنے۔ پاکستانی مندوب منیر اکرم سیکرٹری جنرل ءِ تینا تدوک آ چھٹی نا بابت یات دہانی کرفے ہراٹی او بھارت اٹی کشمیری سیاسی کارندہ آسیہ اندرابی نا 2016 آن پدریسہ قید انا کنڈآ چکار کرفے۔ اوچھٹی اتون پاکستانی پارلیمنٹ نا ایوان بالا نا منظور کروک قرارداد ءِ ہم خلکونے ہراٹی پاننگانے کہ پاکستانی حکومت اقوام متحدہ نا کمک اٹ بھارت نا کوزہ ٹی مقبوضہ جموں کشمیر اٹی حریت راہشون یاسین ملک و ایلو سیاسی راہشون تا غیر کانودی بھارتی قید آن رہائی کن کوشست کے۔ پاکستانی مندوب پیدوار کرے کہ اقوام متحدہ نا انسانی حق انا ہائی کمشنر، خصوصی رپورٹرز و جہانی تنظیم ایمنسٹی انٹرنیشنل، ہیومن رائٹس واچ وار وار آ بھارت آن خواست کرے کہ او تینا ظالمانہ کانود ءِ منسوخ کیر ہرافتے بھارتی فوجی سیاسی راہشون تے غیر کانودی وڑاٹ قید کننگ کن کاریم اٹ اتیک و داآخا بھارتی کمامدارآک کانود ناحکمرانی نا بنداوی اصول آتیا ملنڈ خلکنوو کشمیری تا ساف مقدمہ نا حق و کارروائی ءِ ہم مجروح کرینے۔ پاکستانی مندوب منیر اکرم سیکرٹری جنرل آن خواست کرے کہ او حالیت آتا رداٹ حریت راہشون یاسین ملک نا غیر کانودی قید آن دمدستی رہائی کن بھارت آ زور شاغے و تینا اثرورسوخ ءِ کاریم اٹ اتے۔
