جینوا۔ 19 جنوری (اے پی پی) جہانی ادارہ جان جوڑی نا 148 می ایگزیکٹو کمیٹی نا آن لائن دیوان بناکرینے ہرا 26 جنوری اسکان برجاسلک۔ جہانی ادارہ جان جوڑی نا ڈائریکٹر جنرل ٹیڈروس ایدھانوم گیبریسسس دیوان نا بنائی دود آن تران کرسا پارے کہ نوول کورونا نا دین تالان مننگ نا اسہ سال پد رکھوک و گچین ویکسین نا تیاری ءِ کننگا ہراکہ شاندار سائنسی سرسہبی و آخبت کن اومیت اسے۔ ساڑی ٹی ترندی اٹ تالان مروک آ دین انا سوب آن ویکسینیشن نا اہمیت زیات نمان مننگ ءِ ولے ویکسینیشن نا عمل اٹ بے بریبری، اسہ اہم ءُ خطرہ اسے۔ اوپارے کہ ویکسین نا اولیکو کھیپ مون آ بننگ تون ویکسین اسکان ساف رسینگ ءِ خطرہ غاتون مون تروئی تمانے۔ داسکان بڑزکو کٹیا کروک کم از کم 49 ملک آتیٹی ویکسین نا مسہ کروڑ نود لکھ خور تننگانے وخت اس کہ غٹ آن کم کٹیا والا ملک اٹی بیرہ بیستءُ پنچ خور تننگانے۔ ٹیڈروس داہیت آ زور شاغانے کہ گڑاس ملک آتا کنڈآن تینے اولیت تننگ نا سوب دنیا نا بھاز غریب و نزور مخلوق ءِ خطرہ غاتون مون تروئی تمنگ ءِ ہراٹی کوویڈ۔ 19 نا دین انا تالانی برجاسلک و بنی نوع انسان زیات مشکل آتا گواچی مریک۔ اوپارے کہ جہانی ادارہ جان جوڑی نا غٹ باسک ملک و ڈبلیو ایچ او تینٹ دین آن مسہ سبخ ہلیر ہرافتے ٹی دین انا برخلاف ردعمل، بنی نوع انسان، چندی ساہدار و کرہ ارض انا نیام اٹ تعلقداری و جہانی ادارہ جان جوڑی نا تعمیر ءِ سوگو کننگ اوار ءِ۔ اوغٹ ملک آتیان سیوت و کمک نا خواست کرے۔
