جکارتہ۔ 15 جنوری (اے پی پی) انڈونیشیا نا جزیرہ سلاویسی ٹی 6.2 درجہ شدت نا زمی جمب نا لوڈو محسوس کننگا ہراٹی 34 بندغ زوال و چندیک ٹھپی مسر وخت اس کہ ہسپتال نا ماڑی نا تمنگ آن کیہی ناجوڑ و عملہ نا باسک آک کیرغ مسر وخت اس کہ زمی جمب آن چندی ماڑیک بھس مسر۔ فرانسیسی خبررساں ادارہ امریکی جیالوجیکل سروے نا بابت پارے کہ جمعہ نا سہب اتون جزیرہ سلاویسی آ بروک آ ترند زمی جمب نا مرکز جزیرہ نا ماموجو شار انا سویل اٹی 36 کلومیٹر مُر 18 کلومیٹر نا گہرائی ٹی ئس۔ زمی جمب نا سوب آن مخلوق اٹی خوف و بھیم اس تالان مس وخت اس کہ ویسٹ سلاویسی نا دارالحکومت ماموجو ٹی اسہ ہسپتال اسے نا ماڑی تما و سڑک آک تل کریر۔ نیشنل ڈیزاسٹر میٹی گیسشن اتھارٹی نا سروک پارے کہ زمی جمب نا سوب آن شار ماموجو و اونا سویل اٹی 34 بندغ زوال و چندیک کیرغ مسر ہراڑآن مرک آتیٹی ودکی نا گڑتی ءِ۔ زمی جمب نا سوب آن اسہ ہوٹل و ہسپتال اسے تون اوار کیہی ماڑیک بھس مسر۔ ماموجو شار اٹی ریسکیو ایجنسی پارے کہ زمی جمب آن اسہ ہسپتال اسے نا ماڑی پورو بھس مس ہراٹی درزن آن زیات ناجوڑ وعملہ نا باسک آک کیرغ ءُ وخت اس کہ تموک ءُ اُراسے نا کیرغ آن خاہوت نا 8 بندغ ءِ کشنگ کن کمکی کارروائیک برجاءُ۔ یات سلے کہ 2018ء ٹی انڈونیشیا نا جزیرہ سلاویسی نا علاقہ پالو ٹی 7.5 درجہ شدت نا زمی جمب آن 4،300 آن زیات بندغ زوال و بے گواہ مسوسر۔ میٹرولوجی ایجنسی نا سروک خبڑدار کرینے کہ زمی جمب آن پد آفٹر شاک بننگ کیک و شاریک سونامی نا حالیت اٹ کرکی علاقہ و سمندر نا کنڈآہِننگ آن پانادکیر۔
