پاکستان و ترکی نا نیام اٹ ڈل آتا کہول آ مذاکرات، واپاری، اقتصادی کمکاری نا مون آ دننگ کن اسیجائی کوشست آتے برجاتخنگ آ امنا کننگا، ترجمان دفترخارجہ

اسلام آباد۔ 13 جنوری (اے پی پی) پاکستان وترکی ہڑتوم آ کنڈآتا واپاری، اقتصادی کمکاری نا مون آ دننگ کن اسیجائی کوشست آتے برجاتخنگ آ امنا کرینو۔ ترجمان دفترخارجہ نا رداٹ ہڑتوم آ ملک آتا نیام اٹ ڈل آتا کہول آ مذاکرات چارشنبے نادے آ وزارت خارجہ ٹی اڈ ہلک۔ ترک ڈل انا کماشی ءِ ترک وزیر خارجہ مولود جاوش اولو وخت اس کہ پاکستانی ڈل انا کماشی ءِ وزیر خارجہ مخدوم شاہ محمود قریشی کرے۔ مذاکرات اٹی ہڑتوم آ کنڈآتا تعلقداری، پاکستان و ترکی نا نیام اٹ چندی بشخ آتیٹی کثیر الجہتی اسٹریٹجک شریداری نا چندی پلو آتیا گپ وتران کننگا۔ شاہ محمود قریشی ترک وزیر خارجہ نا سفارتی خذمت آتا اعتراف اٹی ہلال پاکستان ملنگ آ ترک وزیر خارجہ ءِ مبارکبادی تس و پارے کہ فروری 2020اٹی صدر طیب اردوان نا دورہ پاکستان ہڑتوم آ ملک آتا نیام اٹ ہڑتوم آ کنڈآتا تعلقداری پین سوگو مس۔ وزیر خارجہ ترکی ٹی گیس انا پوسکن آ کوڑی تا خننگ انگ آ ترک وزیر خارجہ ءِ مبارکبادی تس۔ وزیر خارجہ پارے کہ کورونا دین انا جہانی دین انا حالیت آک مچ آ دنیا نا زرگزرانءِ بھس کرینے کورونا نا دین انا ارٹ میکو ریسہ پین خطرناک مننگ ءِ۔ پاکستان کون آ پدتموک ملک آتیکن کورونا نا دین انا زرگزرانی زہمک شدید نوعیت نا ءُ۔ شاہ محمود قریشی پارے کہ دا زرگزرانی زہم تتون مون تننگ کن جہانی کہول آ اسیجائی کوشست آتے کاریم اٹ اتنگ و نزور زرگزران تے سیبو تننگ نا گرج ءِ۔ ننے ہمو گام گیج آتیا سجفوئی ءِ ہرافتا کمک اٹ نن پاکستان و ترکی نا نیام اٹ ہڑتوم آ کنڈآتا تعلقداری تے اسٹریٹجک شریداری ٹی بدل کننگ کینہ۔ وزیر خارجہ شاہ محمود قریشی پارے کہ ترکی و پاکستان نا نیام اٹ ہڑتوم آ کنڈآتا واپاری تعلقداری ءِ مون آ دننگ کن نن ترک کاروباری خواجہ غاتیکن ای ویزہ جاری کرینن۔ شاہ محمود قریشی پارے کہ اقوام متحدہ نا ہیومن رائٹس کونسل نا دُوارہ رکنیت، ایف اے ٹی ایف و جموں و کشمیر نا ویل آ ترکی نا مخ تفی آ ترک سرکڑدہ غاتا منت وار اُن۔ مقبوضہ جموں و کشمیر اٹی بھارت نا کنڈآن انسانی حق انا بھلا خلاف ورزی و ریاستی دہشت گردی نا چرجوئی برجاءِ۔ وزیر خارجہ پارے کہ انسانی حق اکن متحرک تنظیم و جہانی برادری دا ویل انا سنگینی ءِ سمجھسا مظلوم کشمیری تا روا حق، حق خودارادیت کن توار بڑز کیر۔ جہانی برادری بھارت آ زور شاغے کہ او اقوام متحدہ نا بے کنڈہلوک مبصر آتے مقبوضہ کشمیر اسکان رسینگ ایتے تانکہ دنیا اصل راستکی تے چائے۔ مخدوم شاہ محمود قریشی پارے کہ پاکستان، اوغانستان اٹی امن کن تینا خیرخواہی نا کوشست آتے کاریم اٹ اتنگ ءِواتسا کیک۔ پاکستان، بین الاوغان مذاکرات نا ارٹ میکو دور انا بنانا خیرمقدم ءِ کیک۔ تدوک آ سال اوغانستان نا بھاز انگا بڑزکو مقتدر شخصیت آک پاکستان آ بسر ہرافتے ٹی ڈاکٹر عبداللہ عبداللہ، گل بدین حکمت یار، اوغان ویلوسی جرگہ نا باسک آک و ایلواہم شخصیت آک اوار ئسر۔ وزیراعظم عمران خان صدر اشرف غنی نا سلہ غا اوغانستان آ ہنناو پاکستان و اوغانستان نا نیام اٹ ہڑتوم آ کنڈآتا تعلقداری ءِ سوگو کننگ کن جامع روڈ میپ آ امنا کننگا، مخدوم شاہ محمود قریشی پارے کہ پاکستان ہمو منہ ملک آتیٹی اوار ءِ ہرا نگورنوکاراباخ نا معاملہ غا آذربائیجان نا موقف نا نئے بیرہ مخ تفی ءِ کرے بلکن آرمینیائی فوج انا زوت کشنگ آ زور شاغا ۔ وزیر خارجہ مخدوم شاہ محمود قریشی پارے کہ فلسطین نا بابت پاکستان دوریاستی ایسری نا موقف آ سلوک ءِ۔ ترک وزیر خارجہ جم جوش بخیر آ وزیر خارجہ مخدوم شاہ محمود قریشی نا منت واری ءِ ہرفسا پارے کہ نن پاکستان ءِ تینا ارٹ میکو اُراسمجھنہ۔ ترک وزیر خارجہ نا پاکستان و ترکی نا نیام اٹ ہڑتوم آ کنڈآتا واپاری، اقتصادی کمکاری نا مون آ دنگن کن اسیجائی کوشست آتے برجاتخنگ نا عندیہ تس۔