اسلام آباد۔ 13 جنوری (اے پی پی) وزیراعظم عمران خان پارینے کہ اشرافیہ نا کرپشن پاکستان نا شونداری کن بھاز بھلو خطرہ اسے، دا اشرافیہ استحصال کارڈ انا پد اٹ تینے ڈکھنگ کپسہ، مہالو پاناما پیپرز و ولدا براڈ شیٹ ننا حکمران اشرافیہ نا کرپشن و منی لانڈرنگ نا پڑدہ ءِ پاش کرے، اشرافیہ این آر او نا چم بازی تا کمک اٹ تینا دولت ءِ رکھ تسر و الس ءِ نسخانی کریر۔ چارشنبے نادے آ تینا ٹویٹ اٹی اوپارے کہ نن خوانہ براڈ شیٹ پورو شفافیت اٹ جاست وپاست کے۔ وزیراعظم پارے کہ پاناما پیپرز ننا حکمران اشرافیہ نا کرپشن و منی لانڈرنگ ءِ مہالو آن پاش کرے و داسہ براڈ شیٹ اسہ وار ولدا اوفتا کرپشن و منی لانڈرنگ نا پڑد ءِ بھلو کچ اسے آ پاش کرے، کرپشن نا دا پت انا پاشی داسکان بیرہ بناءِ۔ دااشرافیہ ’’استحصال‘‘ ناکارڈ انا پد اٹ تینے ڈکھنگ کپسہ۔ داہراتم اقتدار اٹی بریرہ تو لُٹ وپل کیرہ۔ وزیراعظم پارے کہ انت اکن وار وار آ دا انکشاف مننگ ءِ، ہندا ہیت ءِ ای کرپشن نا برخلاف تینا 24 سال انا جہد اٹی کرسا بننگ اُٹ و دا کرپشن پاکستان نا شونداری کن خطرہ اسے۔ وزیراعظم پارے کہ اشرافیہ اوکان پداین آر او نا سیبو ءِ ہلک۔ این آر او تننگ آن نئے بیرہ قوم انا پلوک آ دولت بلکن اوفتا پدی اتنگ کن الس نا خراج آتیان تروک آ پیسہ غاک ہم زیان مسر۔ این آر او نا سوب آن پلوک آ دولت ءِ ہلنگ متو و زیان مسر۔ اوپارے کہ چاہنگ خوانہ براڈشیٹ ءِ پین جاست وپاست آن دیر اس تورے۔ وزیراعظم پارے کہ براڈ شیٹ پیدوار کے کہ دِیر اسے نا پاننگ آ جاست وپاست ءِ توننگا، اشرافیہ پیشن نا ملک میرات آتا رکھ اکن منی لانڈرنگ کیک تانکہ اوفتا برخلاف ملک اٹی کارروائی ہم مننگ کپ۔
