اسلام آباد۔ 13 جنوری (اے پی پی) صدر مملکت ڈاکٹر عارف علوی تون ترکی نا وزیر خارجہ مولود چاوش اولو اوڑدہی کرینے۔ اوڑدہی ٹی پاکستان و ترکی نا نیام اٹ واپار و دودوربیدہ نا بشخ آتیٹی ہڑتوم آ کنڈآتا کمکاری ءِ پین مون آ دننگ آ امنا کننگا۔ داوخت آ صدر مملکت پارے کہ کاروبار کننگ اٹ آسانی نا جہانی درجہ بندی ٹی پاکستان نا پوزیشن اٹی بھاز جوان گچینی بس، ترک زرکارآتے پاکستان نا کاروبار دوست ماحول آن فائدہ ہرفنگ نا گرج ءِ۔ صدر عارف علوی مقبوضہ جموں و کشمیر آ پاکستان نا اصولی موقف آ ترک سرکڑدہ نا منت واری ءِ ہرفے۔ صدر اقوام متحدہ نا جنرل اسمبلی ٹی ترک صدر نا ساڑی آ تقریر اٹی کشمیری تا حق اٹ توار بڑز کننگ آ منت واری ءِ ہرفے۔ صدر مملکت کورونا دین انا جہانی دین اتون مون تننگ اٹ ترکی نا جہانی کڑد انا ہم ستاءِ کرے۔ ترک وزیر خارجہ پارے کہ ترکی پاکستان تون واپاری تعلقداری تے گچین کننگ نا خواہندار ءِ۔ ترکی تک کمپنی تا پاکستان اٹی زرکاری کن است بڈی ءِ کرسا کیک۔ اوپارے کہ ترکی غٹ جہانی فورم تیا پاکستان نا مخ تفی ءِ برجاتخک۔ نگورنو کاراباخ آ آذربائیجان نا مخ تفی آ ترکی پاکستان ناکمکاری نا ستاءِ کیک۔اوڑدہی ٹی کڑدہ غاک اسلامو فوبیا، خارتس تقریر و اسلام نا برخلاف بے رواداری تون مون تننگ کن اسیجائی گام گیج آتیا اواری اٹ کاریم کننگ نا گرج آ زور شاغار۔
