نیویارک۔ 13 جنوری (اے پی پی) پاکستان جہانی امن کن پوسکن آ خطرہ غاتا سوب مروک آ پرتشدد ہندوتوا نظریہ غاتون اوار قوم پرست نظریہ غاتا سوب بیدادی ٹی ساڑی آ ودکی ءِ توننگ کن اقوام متحدہ نا سلامتی کونسل اٹی ایکشن پلان نا مسودہ ءِ پیش کرے۔ دہشت گردی نا برخلاف جہانی مہم اٹی تینا اہم کڑد ءِ تالان کرسا اقوام متحدہ ٹی پاکستان نا آخبتی مندوب منیر اکرم امریکہ ٹی 11 ستمبر نا جلہو آتیان پد سلامتی کونسل نا کنڈآن منظور کروک آ قرارداد آن پد 20 سال اٹی دہشت گردی نا چٹفنگ کن جہانی کمکاری نا جاچ انا بارواٹی 15 باسکی سلامتی کونسل نا دیوان اٹی پارے کہ تشدد نا مخ تف انتہاپسند رڑ تیان علاقائی و جہانی امن و سلامتی کن پیدوار و ساڑی آ خطرہ لاحق ءِ۔ اوسلامتی کونسل اٹ جمع کرفوک آ ایکشن پلان نا مسودہ ٹی پارے کہ سلامتی کونسل ایلو دہشت گرد رڑتیانبار انتہاپسند تنظیم تے ہم کالعدم گوندے انتئے کہ پرتشدد نسل پرست و انتہاپسند دہشت گردی ناگزیر اٹ بیدادی نا توننگ اٹ اڑنگ شاغک و داعش و القاعدہ کون آ دہشت گرد تنظیم تا ناانصافی، تشدد یا دہشت گردی نا بیانیہ نا سوب خراب حالیت آتا توثیق ءِ کیک۔ اوبھارت اٹی نیو فاشٹ رڑتا حکمرانی نا کندآ چکار کرفسا پارے کہ بھارت نا حکمران جماعت بھارتیہ جنتا پارٹی(بی جے پی) و اونا راست کوپہ نا عسکریت پسند تنظیم آر ایس ایس نا ہندو توانا حامل پرتشدد انتہاپسند نظریہ غا عملدرآمد آن بھارت اٹی رہینگوک آ 18 کروڑ مسلمان تا بقاءِ خطرہ ءِ و اپریل 2020دہلی پروگرام دا نظریہ نا درشانیءِ و جہانی مبصرآک بھارت نا غیر کانودی کوزہ گیری ٹی کشمیر اٹ و بھارت اٹ رہینگوک آ مسلمان تا برخلاف ممکنہ نسل کشی آن بھارت ءِ خبڑدار کرینو۔ اوسلامتی کونسل آن خواست کرسا سلاہ پیش کرے کہ پرتشدد قوم پرستی ٹی ودکی ءِ توننگ کن دمدستی گام گیج کننگے۔
