ایران ءِ سی پیک اٹ اوار کننگ نا خواہندار اُن، اسرائیلءِ اسُل امنا کپنہ، ڈپٹی اسپیکر قومی اسمبلی قاسم خان سوری ن ایرانی نیوز ایجنسیءِ انٹرویو

اسلام آباد۔ 13 جنوری (اے پی پی) ڈپٹی اسپیکر قومی اسمبلی قاسم خان سوری پارینے کہ پاکستان ایرانءِ چین پاکستان اقتصادی راہداری ڈٹ اٹ شریک کننگ نا خواہندار ءِ، پاکستان اسرائیل ءِ اسُل امنا کپک، کشمیرو فلسطین تون اوار ایلو اسیجائی چیلنج آتون مون تننگ کن عالم اسلام ءِ یکجا مروئی تمک، اومیت ءِ مستین نا روایت آتیان چپ پوسکن آ امریکی صدر جوبائیڈن ملک آتیا زور شاغنگ و پابندی خلنگ نا جاگہ غا جہانی امن کن کاریم کیک۔ داخیال آتا درشانی ءِ او ایرانی نیوز ایجنسی ءِ اسہ خصوصی انٹرویو اس ترسا کرے۔ اوپارے کہ سی پیک ڈٹ اٹی چین پاکستان وایران نا نیام اٹ شریداری آن ہر مسٹ آ ملک آتا نیام اٹ اسیجائی کمکاری ءِ مون آ دننگک و ڈیہہ ٹی رابطہ غاتا کسرآک آوار مریرہ ہراڑآن روزگار نا وارخواہی ودی مریک، نیزگاری نا چٹفنگ اٹ کمک رسینگک وواپار ءِ مون آ دننگک۔ چین پاکستان اقتصادی راہداری ڈٹ انا حوالہ ءِ ترسا اوپارے کہ ننا خواہش ءِ کہ ایران ہم دا ڈٹ اٹی اواری اختیار کے انتئے کہ تہران بیجنگ و اسلام آباد نا نیام اٹ شریداری آن مچ آ ڈیہہ ءِ فائدہ مریک۔ قاسم خان سوری پارے کہ نن ہموزموار آتیان خبڑدار مرین ہرا ڈیہہ نا ملک آتا نیام اٹ غلط گمانی ودی کرسا ماحول ءِ خراب کننگ خوارہ۔ اوپارے کہ نئے بیرہ ڈیہہ ٹی بلکن مچ آبرصغیر اٹ دا ودیک پسندانہ عزم انا سدباب ءِ کروئی مریک ہرا ننا اسیجائی فائدہ و ہدف آتیکن خطرہ اسے۔ اوپارے کہ سی پیک ڈٹ ءِ قطعی وڑاٹ 46 ارب ڈالر نائس ولے داسہ دانا مالیت 62 ارب ڈالر اسکان سرمسنے۔ دا ڈٹ انا رداٹ انفراسٹرکچر نا چندی ڈٹ آتا تفنگ نا کاریم برجاءِ۔ پاکستان نا چین اتون قطب دے ٹکی سیم آن سویل دے ٹکی پاکستان اسکان ٹرین و شاہراہ تا ٹرانسپورٹ ڈٹ سی پیک نا اہمءُ بشخ اسے ءُ۔ دا ون بیلٹ ون روڈ انا فلیگ شپ ڈٹ ءِ۔ گوادر بندرگاہ نا شونداری ہم دانا بشخ ءِ۔ اوپارے کہ کیہی ارب ڈالر نا دا ڈٹ آتا کمک اٹ پاکستان و چین نا نیام اٹ مریس و سوگو شریداری وجود اٹی بسنے۔ دا ڈٹ انا سوب آن ہڑتوم آملک آتا نیام اٹ شریداری دفاعی کمکاری آن اقتصادی کمکاری ٹی منتقل مسنے۔ اسرائیل ءِ امنا کننگ نا بابت اسہ سوج اسے ناورندی ٹی اوپارے کہ پاکستان نا حکومت و الس اسرائیل ءِ امنا کپسہ۔ اوڈیہہ نا گڑاس ملک آتا کنڈآن اسرائیل تون کمپرومائز نا حوالہ ءِ ترسا پارے کہ دا بابت ننا موقف بھاز پیدوار ءِ نن اسرائیل ءِ اسُل امنا کپنہ۔ اوپارے کہ اسرائیل نا تینا وجود غیر کانودی ءِ و او مظلوم فلسطینی الس آ ظلم کننگ ءِ و اوفتا گل زمین آ کوزہ گیر ءِ۔ نن دا غاصبانہ گام گیج و ظلم آتا اسُل مخ تفی ءِ کننگ کپنہ، و اسُل تینا فلسطینی ایلم تے تنیا الیپنہ۔ ولے ہرا ملک آک اسرائیل ءِ امنا کرینو دا اوفتا تینافیصلہ ءِ و اوفتا تینا خارجہ پالیسی ءِ۔ اوپارے کہ گڑاس اسلامی ملک آتا کنڈآن اسرائیل ءِ امنا کننگ نا فیصلہ بدبختی اٹ عالم اسلام نا اندرونی اختلاف آتا ڈس ءِایتک ہراڑآن ایلو اسلامی ملک و مسلم امہ ٹی ہم گڑتی اسے ۔ ڈپٹی اسپیکر پارے کہ کشمیر و فلسطین تون وار اسیجائی چیلنج آتیکن عالم اسلام ءِ یکجا مروئی تمک۔ پاکستان و ایران نا نیام اٹ پارلیمانی تعلقداری نا بابت اسہ سوج اسے نا ورندی ٹی اوپارے کہ پاکستان نا قومی اسمبلی ٹی پاک ایران فرینڈ شپ پڑک اس جوڑ ءِ ہرا اسہ بھاز بھلو پڑک اسے پاکستان و ایران نا نیام اٹ پارلیمانی تعلقداری نا بابت اسہ سوج اسے نا ورندی ٹی اوپارے کہ پاکستان نا قومی اسمبلی ٹی پاک ایران فرینڈ شپ پڑک اس جوڑ ءِ ہرا بھلو پڑک اسے۔ نن تینا برادر ہمسایہ ملک ایران تون ہڑتوم آ کنڈآتا تعلقداری تے چندی بشخ آتیٹی پین سوگو کننگ کن سنبرینگوک اُن۔ ایران کوئٹہ غان بھاز خڑک ءِ و کوئٹہ بلوچستان نا صوبائی دارالحکومت ءِ۔ بلوچستان نا صوبائی حکومت بنجائی حکومت تون اواری اٹ سیمی انفراسٹرکچر ءِ گچین کننگ تون اوار اوار ہڑتوم آ کنڈآتا واپار و ایلو کمکاری نا بشخ آتیٹی بروک آ اڑاند آتے مُر کننگ اٹ تینا کڑد ءِ ادا کننگ ءِ۔