اقوام متحدہ۔ 11 جنوری (اے پی پی) اقوام متحدہ نا سیکرٹری جنرل انتونیوگوتریش اقوام متحدہ نا جنرل اسمبلی نا اولیکو دیوان نا اڈتننگ نا 75 می سال دے انا وخت آ اسہ ویڈیو کانفرنس اسے ٹی تقریر کرسا خواست کرے کہ پوسکن آ وڑنا کثیر الطرفہ پسندی نا کمک اٹ جہانی چیلنج آتے ایسر کننگے و بے بریبری و ناانصافی ءِ کم کننگ نا کوشست کننگے۔ اوپارے کہ اقوام متحدہ نا جوڑ مننگ آن پد آن دا وخت بھلا واکدار آتا نیام اٹ فوجی جھیڑہ غاتیان بیدس دنیا نا ریکارڈ تاریخ اٹ غٹ آن مریس وخت ءِ۔ سرسہبی تا دوئی کننگ تون اوار اوار، دنیا ءِ آب و ہوا نا بدلی تتون مون تننگ اٹ بھاز مشکل مون تروئی تمنگ ءِ، روایتی جنگ ءِ ایسر کننگ مشکل مرسا ہِننگ ءِ، جغرافیائی سیاسی تناؤٹی ودکی مرسا کننگ ءِ، جوہری تالانی و جوہری تصادم نا خطرہ دُوارہ پاش مرسا کننگ ءِ، بے بریبری و بین ودنگ ءِ۔ اومستی پارے کہ باہم وابستہ دادنیا ٹی ، باہم مربوط کثیر الطرفہ پسندی نا گرج ءِ تانکہ جہانی و علاقائی تنظیمک اسہ ایلو تون گپ وتران کننگ کیر و اسیجائی ہدف آتا دوئی کننگ کن اواری اٹ کاریم کیر۔ او جہانی چیلنج آتے ایسر کننگ، و جہانی کہول آ گلوبل نیوڈیل و قومی کہول آ پوسکن آ راجی معاہدہ نا کمک اٹ بے بریبری و ناانصافی ءِ کم کننگ کن نیٹ ورک و جامع کثیر الطرفہ پسندی آ زور شاغا۔
