اسلام آباد۔ 07 جنوری (اے پی پی) پارلیمنٹ نا پبلک اکاؤنٹس کمیٹی آر ایل این جی نا ہلنگ، بہا و پالیسی سازی نا بابت وزارت پٹرولیم نا بریفنگ آ است جم مفننگ نا درشانی ءِ کرسا پارینے کہ انجام آن ایڑتر قوم انا فائدہ ٹی فیصلہ کروئی تمک، پارلیمنٹ نا کمیٹیک قاعدہ نا رداٹ واکدار ءُ، مالیاتی نظم و نسق تون اوار ایلو امور نا چاروکی نا بابت پی اے سی تینا فرض آتے پورو کیک۔ پی اے سی نا دیوان پنچ شنبے نادے آ پارلیمنٹ ہاؤس اٹی پی اے سی نا چیئرمین رانا تنویر حسین نا کماشی ٹی مس۔ دیوان اٹی کمیٹی نا باسک ابراہیم خان، راجہ ریاض احمد، مشاہد حسین سید، نورعالم خان، حناربانی کھر، شاہدہ اختر علی، اقبال محمد علی خان، شیخ روحیل اصغر، سردار ایاز صادق، منزہ حسن، سید حسین طارق تون اوار تعلقدار سرکاری ادارہ غاتا آفیسر آک بشخ ہلکر۔ دیوان اٹی پٹرولیم ڈویژن نا 2019-2020نا آڈٹ اعتراض آتا جاچ ءِ ہلنگا۔ چیئرمین رانا تنویر حسین پارے کہ آرایل این جی اسہ حساس ءُ معاملہ اس جوڑ مسنے۔ اگہ گرج تما تو خصوصی کمکار ندیم بابر ءِ ہم بٹنگنہ۔ مسکوہی اسپیکر گوہر ایوب نا دور اٹی کمیٹی تا قاعدہ ٹی ترمیم کرسا واکدار جوڑ کننگا۔ اوپارے کہ دابابت پٹرولیم منسٹری نا کنڈآن اسپیکر ءِ اسہ چھٹی اس رسینگانے ہراٹی پاننگانے کہ پی اے سی بیرہ آڈٹ اعتراض آتسکان ہی تینا کڑد ءِ ادا کے۔ اوپارے کہ ننا ہرا زمواری ءِ پورو کینہ۔ سیکرٹری پٹرولیم اسد حیاالدین پارے کہ پارلیمنٹ واکدار ءِ۔ ننے پارلیمنٹ نا بالادستی آ ہچ ءُ شک و شبہ اس اف۔ ننے آن ہروڑنا سوج کننگ مریک۔ اوپارے کہ ویل دادے کہ پاکستان اٹ داوخت آ ہندی و درآمدی اِرا گیس ءُ وخت اس کہ اوفتا نہاد اٹی پرخ ءِ۔ ہنداڑآن خواست ر رسینگ اٹ پرخ بریک۔ ہراتم ہڑتوم آ گیس آتے مکس کینہ تو لامحالہ نہاد ودک و ننے گردشی وام تا مون تروک مریک۔ کمیٹی ءِ پاننگاکہ داوخت آ میڈیا ٹی 122 ارب روپئی نا نسخان تا ہیت ءِ کننگ انگ ءِ حالانکہ دامسہ تُو اکن نن بیرہ 35 ارب نا ایل این جی ہلکونن۔ اگہ نہاد بیرہ 35 ارب مریک تو 122 ارب نا نسخان امر مننگ کیک۔ ایل این جی بیرہ ڈیمانڈ آ خواہفنگک۔ اوہم داحالیت اٹ ننے معلوم مس کہ اونا نہاد ءِ دیر ادا کننگ کن تیار ءِ۔ پی اے سی نا چیئرمین رانا تنویر حسین پارے کہ اگہ ضرورت ئس تو پوسکن ءُ ٹرمینل انت اکن خلنگتو۔ وخت آ ایل این جی انت اکن خلنگتو۔ وخت آ فیصلہ ہلپننگ نا سوب آن 122 ارب روپئی نا نسخان تا ہیت مننگ ءِ۔ کمیٹی نا باسک منزہ حسن پارے کہ اصل ویل پالیسی سازی نا کمتی و وخت آ خواست ورسینگ نا تعین مفننگ ءِ۔ سردار ایاز صادق پارے کہ قطر گیس اتون پے اینڈ ٹیک انا معاہدہ ءِ۔ 60 درسد گیس انا خریدار آئی پی پیز ءِ۔ اوپارے کہ آئی پی پیز اتون بہانا بابت ہچ ءُ معاہدہ اس ساڑی اف۔ اوپارے کہ فیصلہ داخاطران کننگپک کہ غٹ ءِ سماءِ کہ ہراسٹ کہ فیصلہ کیک نیب اودے ہلیک۔ اوپارے کہ داسہ اخہ مخلوق نا کمیشن اس تولفرہ۔ دامعاملہ بایدے کابینہ غاکائے۔ سیکرٹری پٹرولیم پارے کہ گیس انا ہلنگ ءِ پیپرا کانود نا رداٹ کننگک۔ مینو فیکچررز آن بیدس گڑاس ٹریڈنگ کمپنی ہم اریر ہرافتیان گیس ہلنگک۔ 2022اسکان 66 درسد آر ایل این جی نا کھپت پاور پلانٹ اٹ مریک۔ اوکان پد دا معاہدہ چٹک۔
