چیچہ وطنی۔ 07 جنوری (اے پی پی) بنجائی وزیر موسمیاتی بدلی ملک امین اسلم پارینے کہ ماحولیاتی کچٹی انسانی بقا و شونداری ٹی غٹ آن بھلا اڑاند مسنے ہراڑآن بے وخت پِر مننگ ءِ و موسم تا شدت اٹ ودکی مننگ ءِ ہراڑآن نئے بیرہ فصل آتا پیدوار زہمی مننگ ءِ بلکن انسان چندی ناجوڑی تا ہم گواچی مننگ ءُ، گرج داہیت انا ءِ کہ ماحولیاتی کچٹی نا ویل انا سنگینی ءِ سرپند مننگے و دانا زہم تے کم کننگ کن ہلہلہ ئی بنداو تیا گام گیج کننگے، وزیراعظم پاکستان عمران خان نا بلین ٹری ڈٹ ہنداچرجوئی نا اسہ اہم ءُ کڑی اسے ہراٹی لس شاری تا بشخ ہلنگ بھاز المی ءِ۔ اوداہیت ءِ کمشنر آفس اٹ مروک آ اسہ خصوصی ءُ دیوان اسے ٹی پارے ہراٹی ساہیوال ڈویژن اٹ ماحولیاتی بدلی آن ودی مروک آ حالیت آتا سرجم جاچ ءِ ہلنگا۔ دیوان اٹی کمشنر ساہیوال نادر چٹھہ، مسکوہی بنجائی وزیر چوہدری نوریز شکور خان، مسکوہی تحصیل ناظم پنڈی گھیب ضلع اٹک ملک خرم علی خان، ڈپٹی کمشنرز بابربشیر، عامر عقیق و احمد کمال مان، ڈائریکٹر جنرل پی ایچ اے محبوب احمد، ایڈیشنل کمشنر کوآرڈی نیشن شفیق احمد ڈوگر، ڈائریکٹر لوکل گورنمنٹ اظہر دیوان، ڈویژنل فاریسٹ آفیسر ملک وسیم سجاد و چیف میٹروپولیٹن آفیسر فرمائش علی خان تون اوار ایلو تعلقدار آفیسر آک ہم بشخ ہلکر۔ اوپارے کہ ماحولیاتی کچٹی ءِ مُر کننگ کن المی ءِ کہ لس بندغ ءِ ہم آگہی فراوان کننگے و سول سوسائٹی ءِ اوار کننگے تانکہ ویل ءِ آخبتی بنداو تیا ایسر کننگ مرے۔ دیوان اٹی کمشنر نادر چٹھہ پارے کہ ایشیائی شونداری بینک انا کمک اٹ ساہیوال شار اکن 12 ارب روپئی نا سٹی ایمپرومنٹ پروجیکٹ اسے نا بناءِ کننگ انگ ءِ ہرانا رداٹ شار انا غٹ سیوریج و واٹر سپلائی لین تے بدل کننگک وخت اس کہ پین ٹیوب ویل، واٹر فلٹریشن پلانٹس و اوور ہیڈواٹر ریزووائرز ہم تفنگک تانکہ شار انا گرج آک پورو مننگ کیر۔ داکان بیدس ویسٹ واٹر ءِ ری سائیکل کننگ کن اِراٹریٹمنٹ پلانٹ ہم خلنگک۔ دیوان اٹی ڈائریکٹر لوکل گورنمنٹ اظہر دیوان کلین اینڈ غرین پروگرام نا رداٹ ساہیوال اٹ مروک آ سرجزآتے سرجم مون آ تخا وپارے کہ مہم اٹی 30 واٹر فلٹریشن پلانٹ آتا مرمت ءِ کرفنگا، شار انا غٹ سیور لین تا سفائی ءِ کرفنگا، کنوئی آ دیر انا کوالٹی ٹیسٹنگ کننگا، 29 پارک گچین جوڑ کننگا و شار انا غٹ 56 سرکاری اسکول آتیٹی 90 ہزار نیال خلنگا وخت اس کہ بلین ٹری ڈٹ انا رداٹ مچ آ ڈویژن اٹ 32 لکھ 85 ہزار آن زیات نیال خلنگانے ہرافتا رکھ ءِ ہم پک کننگانے۔ بنجائی وزیر موسمیاتی بدلی ملک امین اسلم کلین اینڈ گرین مہم نا سرسہب پوروی آ ہر مسٹ آ ضلع غاتا انتظامیہ نا کوشست آتا ستاءِ کرے و ساہیوال اٹ سالڈویسٹ مینجمنٹ ٹریننگ اکیڈمی اس جوڑ کننگ نا پڑو ءِ کرے ہراڑے بلدیاتی ادارہ غاتا سفائی تون تعلقدار ملازم آتے تربیت فراوان کننگک۔
