اسلام آباد۔ 07 جنوری (اے پی پی) پاکستان اٹی اٹلی ناسفیر اندریاس فیراریز پارینے کہ اٹلی ٹیکسٹائل نا صنعت ءِ ٹیکنالوجی آ گدریفنگ نا کمک اٹ پوسکن جوڑ کننگ آن پاکستان تون اقتصادی و واپاری تعلقداری تا پوسکن آ دورانا بناءِ کننگ خواہک۔ اوداہیت ءِ اے پی پی تون خصوصی گپ وتران کرسا پارے۔ اوپارے کہ چاگڑد دوست زرگزران، ٹیکسٹائل نا صنعت کن ٹیکنالوجی نا گدریفنگ، کشت وکشار آ مبنی صنعت، تعمیرات، جان جوڑی و تعلیم ہندنءُ بشخ ءُ ہراڑے ہڑتوم آ ملک آتا نیام اٹ ہڑتوم آ کنڈآتا کمکاری ءِ مون آ دننگ مریک۔ اوپارے کہ ماحول دوست زرگزران نا بشخ اٹی اٹلی پاکستان تون ماحولیاتی رکھ، گردشی زرگزران، وسیلہ غاتا بچت و انتظام و انصرام، ایکو سسٹم نا رکھ، دیر انا رکھ و قدرتی آفت آتون مون تننگ نا بشخ آتیٹی کمک کننگ خواہک۔ اسہ سوج اسے آ اوپارے کہ اٹلی فیصل آباد نا نیشنل ٹیکسٹائل یونیورسٹی ٹی اٹلی پاکستان ٹیکسٹائل ٹیکنالوجی سینٹر اس جوڑ کرینے ہرانا مسخت ٹیکسٹائل نا ہندی صںعت ءِ پوسکن کننگ نا ءِ۔ دا سینٹر اٹ اٹلی نا ٹیکسٹائل نا صنعت اٹ کاریم اٹ اتوک آ مشینری تخنگانے، دا سینٹر ساڑی ہی ٹی جوڑ کننگانے۔ دا سینٹر نا جوڑ کننگ اٹ اٹلی نا حکومت مالی کمک فراوان کرینے۔ اطالوی سفیر پارے کہ پاکستان تون واپار و زرگزران نا بشخ آتیٹی رابطہ غاتے ودفنگ کن پوسکن ءُ اقتصادی مشن اس تعینات کننگ انگ ءِ۔ انتئے کہ نن سمجھنہ کہ پاکستان تون زرگزران نا چندی بشخ آتیٹی واپار ءِ ودفنگ نا بھلو کچ اس ساڑی ءِ۔ پوسکن آ مشن کراچی و اسلام آباد اٹی جوڑ مریک۔ اوپارے کہ ہڑتوم آ ملک آتا نیام اٹ ہڑتوم آ کنڈآتا واپار ءِ بروک آ مسہ سال اٹی 5 ارب ڈالر سالانہ اسکان ودفنگ نا کچ ساڑی ءِ، داوخت آ ہڑتوم آ ملک آتا نیام اٹ ہڑتوم آ کنڈآتا واپار نا کچ 1.7 ارب ڈالر نا لگ بھگ ءِ۔ مالی سال 2020اٹی اٹلی ءِ پاکستانی برآمد آتا کچ 731 ملین ڈالر مسنے، پاکستان زیات تر ٹیکسٹائل، لیدر، چاؤل،ایتھانول، پچ، کاٹن، سیرئیل، بیوریجز و بوٹ برآمد کننگ ءِ، تدوک آ مالی سال اٹی پاکستان اٹلی آن 521 ملین ڈالر نا درآمدات کرے ہرافتے ٹی جہاز، کشتی، مشینری، فارمامصنوعات، ائیر کرافٹ، سپیس کرافٹ، الیکٹرانک ازباب، مانیاتی مرکبات، آئرن و اسٹیل سرفہرست ءُ۔ داوخت آ اٹلی ٹیکسٹائل، لیدر و ماربل نا بشخ آتیٹی پاکستانءِ تکنیکی کمک فراوان کننگ ءِ، ڈیری ولائیو اسٹاک، زیتون، پلاسٹک، پراسیسڈ خور و تعمیرات ہندن ءُ بشخ ءُ ہراڑے اٹلی پاکستان ءِ تکنیکی کمک فراوان کننگ کیک۔ اطالوی سفیر پارے کہ پاک اٹلی مشترکہ اقتصادی کمیشن ہڑتوم آ کنڈآتا واپاری و اقتصادی معاہدہ غاتا فورم ءِ ہرانا دیوان برجاسال انا آخیری سہ ماہی ٹی روم اٹ گمانی ءِ۔ اوپارے کہ یورپی یونین نا ملک آتیٹی پاکستان تون واپار اٹ اٹلی نا بشخ 10 درسد ءِداکان بیدس اٹلی ٹی پاکستانی کمیونٹی ملک ءِ ترسیلات زر فراوان کننگ نا اسہ بھلو ذریعہ اسے۔ اومستی پارے کہ اطالوی سفارت خانہ نا پوسکن آ ماڑی پورو مسنے و زوت ہی ہموڑے سفارت خانہ ءِ گدریفنگک۔
