اسلام آباد۔ 05 جنوری (اے پی پی) چیئرمین سینیٹ محمد صادق سنجرانی پارینے کہ پاکستان اٹ معدنیات نا بابت تعلیم و کسب نا شونداری ٹی عمرخان سنجرانی یونیورسٹی اہم ءُ مزل نا نشان اس مریک، معدنیات آن شُپ ملک اٹی فنی تعلیم آن آراستہ کسبکار بندغ آتا سخت گرج ءِ۔ داخیال آتا درشانی ءِ او ایچ ای سی نا ایگزیکٹو ڈائریکٹر شائستہ سہیل تون گپ وتران کرسا کرے ہرا سے شنبے نادے آ داڑے اوڑتون اوڑدہی کرے۔ اوڑدہی ٹی نوکنڈی، چاغی ٹی عمرخان سنجرانی معدنیات و قدرتی وسیلہ غاتا یونیورسٹی نا جوڑ کننگ نا بابت پیش رفت آن معلومدار کرے۔ داوخت آ چیئرمین سینیٹ پارے کہ پاکستان اٹ معدنیات نا بابت تعلیم و کسب نا شونداری ٹی عمرخان سنجرانی یونیورسٹی اہم ءُ مزل نا نشان اس مریک۔ چیئرمین سینیٹ پارت کرے کہ ڈٹ انا آب ءِ پک کننگ و وخت آ پورو کننگ کن قابل لائحہ عمل اس جوڑ کننگے۔ 500 ایکڑ آ جوڑ کروک آ دا سلاہ ئی یونیورسٹی تینا وڑنا یکتا ءُ ڈٹ اسے۔ اوپارے کہ معدنیات آن شُپ ملک اٹ فنی تعلیم آن آراستہ کسبکار بندغ آتا سخت گرج ءِ۔ داوڑنا تعلیمی ادارہ غاک معدنیات نا مون آ دننگ کن درکار افرادی قوت ہندی کہول آ فراوان کیرہ۔ دا ڈٹ آ خڑچ انا بنائی کساس 6 ارب روپئی خلنگانے۔ چیئرمین سینیٹ پارے کہ ڈٹ انا وخت آ پوروی کن غٹ تعلقدار ادارہ غاک مربوط کوشست کیر۔ ڈٹ انا چندی مرحلہ غاتا پوروی ءِ تروک آ ٹائم فریم نا رداٹ کننگے۔ داوخت آ ایگزیکٹو ڈائریکٹر ایچ ای سی پارے کہ یونیورسٹی نا جوڑ کننگ کن پی سی (II)سی ڈی ڈبلیو پی آن مہالوآن منظور مسنے۔ تعمیراتی کاریم نا فزیبلٹی سٹڈی کن ٹینڈر آتا مرحلہ غاتیان پد کنسلٹنٹ نا خذمت دوئی کننگانے۔ کنسلٹنٹ موقع غا تعمیراتی کاریم نا نوعیت و ایلو تعلقدار باندات آتا جاچ ءِ ہلنگ آن پد اسہ تُواٹی فزیبلٹی ءِ پورو کیک۔ اوپارے کہ ڈٹ آتا جاچ رپورٹ 25 جنوری وخت اس کہ تعمیرات نا بناءِ کننگ نا بابت حتمی رپورٹ ءِ 5 مارچ 2021اسکان جمع کرفنگک۔
