اسلام آباد۔ 05 جنوری (اے پی پی) بنجائی وزیر امور کشمیر و گلگت بلتستان علی امین خان گنڈاپور پارینے کہ اقوام متحدہ کشمیری تا حق خودارادیت کن پاس کروک آ قرارداد آتیا عملدرآمد کرفے، حق خودارادیت کن ہزار آ کشمیری تینا جان تا قربانی ءِ پیش کرینو، بھارت تینٹ کشمیر نا ویل ءِ اقوام متحدہ نا فورم آ دریسس۔ یوم حق خودارادیت نا وخت آ تینا کلہو اٹی علی امین گنڈاپور پارے کہ بھارت مقبوضہ کشمیر اٹی اقوام متحدہ نا قرارداد آتے لتاڑنگ ءِ، بھارت اٹ پن نا جمہوریت و سیکولرزم دفن مسنے، اگست 2019 نا بھارتی گام گیج نا مسخت مقبوضہ کشمیر نا ڈیموگرافی ءِ بدل کننگ ناءِ، مچ آ دنیا بھارت ءِ مذہبی آجوئی و انسانی حق انا بابت بدترین ملک گوندنگ ءِ۔ تدوک آ سال بھارت ایل او سی آ سد آ شاری تے شہید کرے و اقوام متحدہ نا مبصر آتے شست کرے، پاکستان اٹ دہشت گردی نا قابل مذمت کارروائی تا پداٹ بھارت نا دُو ءِ۔ علی امین گنڈاپور پارے کہ دہشت گرد تنظیم تیان بھارتی گٹھ جوڑ نا بابت شاپدی پاکستان اقوام متحدہ نا حوالہ کرینے۔ وزیراعظم عمران خان کشمیر نا ویل ءِ دنیا نا ہر فورم آ ہرفنگ کن عملی گام گیج کرے، یورپی یونین و برطانوی پارلیمنٹ تون اوار مچ آ دنیا ٹی کشمیری تا حق اکن توار بڑز مننگ ءِ۔ علی امین گنڈاپور پارے کہ اقوام متحدہ ہندوانتہاپسند گام گیج آتا توننگ کن بھارت نا برخلاف دمدستی کارروائی کے، حق خودارادیت نا قرارداد آتیا عملدرآمد ڈیہہ ٹی امن و سلامتی کن المی ءِ
