اقوام متحدہ۔ 31 دسمبر(اے پی پی) اقوام متحدہ نا آخبتی مندوب منیر اکرم 2020ءِ پاکستانی مشن نا مریس و کوشست آتا سال گوندسا پارے کہ 2020اٹی اقوام متحدہ ٹی پاکستان نا بنداوی مسخت دنیا نا مون آ غیر کانودی بھارتی کوزہ گیری ٹی مقبوضہ جموں و کشمیر اٹ بھارتی فوجی گھیڑ و انسانی حق انا بھلو کچ اسے ٹی خلاف ورزی تے بے نقاب کننگ ئس۔ اوپنچ شنبے نادے آ اقوام متحدہ ٹی 2020اٹی پاکستان نا کڑد آ مبنی ویڈیو کلہو اٹی سال انا ایسر آ جاری جاچ رپورٹ نا بابت پارے کہ پاکستان نا سرکڑدہ نا گچین راہشونی نا رداٹ نن اقوام متحدہ ٹی چندی کثیر الجہتی عمل اٹ مرکزی کڑد ادا کرین و 2020نا سال اقوام متحدہ ٹی پاکستانی سفارتکاری کن دالحاظ اٹ سرسہب سال مس کہ داٹی پاکستان سرسہبی اٹ کشمیری الس نا آجوئی نا جہد کن کانودی، سیاسی و اخلاقی مقدمہ پیش کرے و الس نا وتواجہی کن پاکستان نا کماشی ٹی قرارداد پیش کرے ہرادے جنرل اسمبلی امنائی سلاہ اٹ منظور کرے۔ پاکستانی مندوب پارے کہ اقوام متحدہ نا سلامتی کونسل 2020اٹی چین نا مخ تفی و پاکستان نا درخواست آ بھارت نا غیر کانودی کوزہ گیری ٹی مقبوضہ کشمیر نا حالیت آتیا 2 واردیوان اٹی شرہ کرے و غٹ آن اہم داکہ بھارت اٹ بی جے پی و آر ایس ایس نا حکومت نا کشمیر نا خصوصی حیثیت ءِ چٹفنگ نا متنازع، غیر کانودی و اسہ کنڈی کانود ءِ اسہ سال پورو مننگ آ 5 اگست آ ساڑی ہی ٹی دیوان اس اڈ تس و مقبوضہ کشمیر نا حالیت و بھارتی ریاستی دہشت گردی ءِ پدریسہ سرجمی اٹ مون آ تخنگا بلکن اقوام متحدہ نا سیکرٹری جنرل انتونیوگوتریش ءِ سرجم ڈوزیئر پیش کننگا۔منیر اکرم پارے کہ نن غلط معلومداری نا نیٹ ورک آتا توننگ کن ہم کاریم کننگ اُن و دا چرجوئی ٹی نن دنیا ءِ بھارت نا شناخت نا دُزی، ٹیکنیکل و اقوام متحدہ نا نظام آن غلط انا کمک اٹ دروغ آ مبنی پروپیگنڈا آن خبڑدار کرسا حقی و ساڑی آ گڑتی آن معلومدار کننگ اُن۔ اوپارے کہ پاکستان اقوام متحدہ ٹی اسلاموفوبیا نا معاملہ ءِ ہرفے و مذہبی علامت آتا شرف و آجوئی سلاہ درشانی آ روا پابندی تا خواست ءِ کرسا بین المذاہب و بین الثقافتی ڈائیلاگ آ مبنی قرارداد پیش کرے ہرادے اسمبلی نا 193 باسک ریاست آک بھلو گیشتری اسے اٹ منظور کریر۔
