نیویارک، ماسکو، نئی دہلی، ریوڈی جنیرو۔ 29 دسمبر(اے پی پی) مچ آ دنیا ٹی کورونا نا دین آن مرک آتا کچ 17 لکھ 81 ہزار اسکان سرمس، چندی ملک آتیٹی ہلوک آ دین آن زہمی بندغ آتا کچ 8 کروڑ 16 لکھ آن گدرینگانے وخت اس کہ روسی حکومت پک کرینے کہ ملک اٹی کورونا دین آن پڑو مروک زوال کروک آتیان مسہ ہنداخہ زیات مرک مسنے۔ سے شنبے نادے آ امریکی میڈیا نا رداٹ دنیا نا چندی ملک آتیٹی کورونا دین انا پک زہمی تا کچ 81669521ءِ، دین آن زہمی ملک آتیٹی داتم اسکان 1781442 بندغ زوال کرینو۔ مچ آ دنیا ٹی کورونا نا فعال زہمی تا کچ 22092293ءِ، کورونا نا دین آن امریکہ غٹ آن زیات زہمی مسنے، برازیل کورونا دین آن مروک آ زوال کروک آتا لحاظ اٹ ارٹ میکو و ناجوڑ آتا بابت مسٹ میکو نمبرآٹی ءِ وخت اس کہ بھارت کورونا دین انا ناجوڑ آتا کچ انا اعتبار اٹ ارٹ میکو زہمی ملک ءِ۔ پوسکن آ حساب وکتاب نا رداٹ مچ آ دنیا ٹی کورونا زوال کروک آتا لحاظ اٹ روس مسٹ میکو بھلا ملک جوڑ مسنے۔ امریکہ ٹی کورونا نا دین آن زہمی بندغ آتا کچ اسہ کروڑ 97 لکھ 81 ہزار ءِ وخت اس کہ مچ آ ملک اٹ دین آن مرک آتا کچ مسہ لکھ 43 ہزار آن گدرینگانے۔ کمامدارآتارداٹ امریکہ ٹی کورونا دین انا ناجوڑ آتا جم کچ 19781624ءِ وخت اس کہ فعال زہمی تا کچ 7741715ءِ۔ امریکہ ٹی ہلوک آ دین آن زوال و فعال کیس آتا کچ اٹ پدریسہ ودکی مننگ ءِ۔ اسہ کروڑ 97 لکھ زہمی تتون امریکہ داوخت آ دنیا ٹی غٹ آن بھلا مرکز ءِ۔ امریکہ ٹی ہلوک آ کورونا دین آن داتم اسکان 343182بندغ زوال کرینو۔ ایڑے بھارت اٹ کورونا دین زہمی تا کچ اسہ کروڑ اِرا لکھ 24 ہزار اسکان سرمسنے۔ بھارت اٹ کورونا دین انا پوسکن آ کیس آتیان پد چندی ریاست آتیٹی کورونا زہمی تا کچ 10224797مسنے وخت اس کہ وزارت جان جوڑی نا حساب وکتاب نا رداٹ مچ آ ملک اٹی کورونا دین انا فعال کیس آتا کچ 269840ءِ۔ سرکاری حساب وکتاب نا رداٹ بھارت اٹ کورونا دین آن جم وڑاٹ 148190 بندغ زوال کرینو۔ ایڑے برازیل اٹی کورونا دین آن زہمی بندغ آتا کچ 75 لکھ وخت اس کہ مرک آتا کچ اسہ لکھ 91 ہزار 6 سد اسکان سرمسنے۔ برازیل اٹ کورونا دین آن زہمی پوسکن آ کیس آتیان پد پک ناجوڑ آتا کچ 7506890مسنے۔ برازیل نا وزارت جان جوڑی نا حساب وکتاب نا رداٹ ملک اٹی کورونا دین آن زوال کروک آتا پک کچ 191641ءِ۔ داکان بیدس روس پارینے کہ ملک اٹی کورونا دین آن مروک آ زوال کروک آتا کچ مسہ گنازیات ءِ۔ داکان مست روس انا صدر ولادیمیر پیوٹن دعویٰ کریسس کہ دین آن روس اٹ کم مرک مسنے و و دیکی ملک آتیان دینی مرض انا بست وبند اٹ اسہ گچین ءُ کاریم اس کرینے۔ ’’روسسٹاٹ‘‘ نا حساب وکتاب نا رداٹ تدوک آ سال انا مقابلہ ٹی جنوری و نومبر نا نیام اٹ روس اٹ ریکارڈ کروک آ غٹ سوب آتیان مرک آتا کچ اٹ ودکی مسنے۔ روس انا نائب وزیراعظم پارے کہ دا وخت اٹی مرک آتیٹی 81 درسد آن زیات نا ودکی کورونا نا سوب آن مسنے ہرانا مطلب دادے کہ 2020ء ٹی کم و ود اسہ لکھ 86 ہزار روسی شاری کورونا دین آن زوال کرینو۔ کورونا دین انا بناآن پد روس اٹ 30 لکھ آن زیات کورونا دین انا ناجوڑ پک مسنے۔ جان ہاپکنز یونیورسٹی نا حساب وکتاب نا رداٹ پوسکن آ اندازہ غاتا مطلب دادے کہ روس اٹ کورونا دین آن دنیا نا مسٹ میکو غٹ آن زیات زوال مسنے۔
