اسلام آباد۔ 14 دسمبر (اے پی پی) جہانی بینک وزیراعظم عمران خان نا کنڈآن 2030ء اسکان پاکستان اٹ 60 درسد ساف وچاگڑد دوست توانائی نا پیدوار نا پڑو نا ستاءِ کرینے۔ پاکستان اٹ جہانی بینک انا کنٹری ڈائریکٹر ناجی بن حسائن دوشنبے نادے آ اسہ بیان اسے ٹی پارینے کہ وزیراعظم عمران خان نا کنڈآن 2030ء اسکان پاکستان اٹی 60 درسد ساف و چاگڑد دوست و گیگ بدل ذریعہ اٹ توانائی نا پیدوار نا پڑو بے کچ ستاکڑزک۔ اوپارے کہ وزیراعظم نا کنڈآن کولاآن بجلی ودی کننگ نا پوسکن آ ڈٹ آتیا پابندی نا پڑوہم بھاز ستاکڑزک ہرانا جہانی بینک پبی ستاءِ کیک۔ جہانی بینک انا کنٹری ڈائریکٹر پارے کہ وزیراعظم پاکستان نا پڑو و عزم ماحولیاتی بدلی و پائیدار شونداری نا ایجنڈا کن بھاز اہمیت تخک۔ یات سلے کہ موسمیاتی بدلی تیا پیرس معاہدہ نا پنچ می سال دے آ جہانی ورچوئل سمٹ آن اسہ تران اسے ٹی وزیراعظم عمران خان پارے کہ پاکستان ساف و چاگڑد دوست توانائی نا کنڈآ ہِننگ ءِ و 2030 ء اسکان جم توانائی نا 60 درسد ذریعہ ءِ کلین انرجی و 30 درسد گاڈی تے بجلی آ گدریفنگ نا ہدف مقرر کننگانے۔ وزیراعظم تینا تران اٹی پارے کہ پاکستان نا ماحولیاتی کچٹی ٹی بشخ اسہ درسد آن ہم کم ءِ ولے دا ہیت افسوزناک ءِ کہ پاکستان ماحولیاتی کچٹی آن غٹ آن زیات زہمی مروک آ پنچ می ملک ءِ۔ وزیراعظم پارے کہ غٹ آن مست نن دا فیصلہ کرینن کہ موسمیاتی بدلی تا اثرآتون مون تننگ کن قدرتی ذریعہ ءِ کاریم اٹ اتیر، دا چرجوئی ٹی نن بروک آ مسہ سال اٹی 10 ارب درخت خلنگ اُن، نن نیشنل پارک و رکھوک علاقہ غاتا کچ ءِ 30 آن ودفسا 45 کرینن۔ وزیراعظم پارے کہ پاکستان کلین انرجی نا کنڈآ ہِننگ ءِ، 2030 اسکان جم توانائی نا 60 درسد ءِ کلین انرجی و قابل تجدید توانائی آ گدریفنگ نا ہدف ءِ، پاکستان ماحولیاتی بدلی نا اثرآتا مون ءِ توننگ کن غٹ تر گام گیج کیک۔
