واشنگٹن، پیرس، نئی دہلی، ریوڈی جنیرو۔ 08 دسمبر (اے پی پی) مچ آ دنیا ٹی کورونا دین آن مرک آتا کچ 15 لکھ 50 ہزار اسکان سرمس ، چندی ملک آتیٹی ہلوک آ دین آن زہمی بندغ آتا کچ 6 کروڑ 79 لکھ آن گدرینگانے۔ سے شنبے نادے آ امریکی میڈیا نا رداٹ دنیا نا چندی ملک آتیٹی کورونا دین انا پک زہمی تا کچ 97938995ءِ، دین آن زہمی ملک آتیٹی داتم اسکان 1550263بندغ زوال کرینو۔ مچ آ دنیا ٹی کورونا نا فعال زہمی تا کچ 19365157ءِ، کورونا دین آن امریکہ غٹ آن زیات زہمی مسنے، برازیل کورونا دین آن مروک آ زوال کروک آتا لحاظ اٹ ارٹمیکو و ناجوڑ آتا بابت مسٹ میکو نمبر آٹے، وخت اس کہ بھارت کورونا نا ناجوڑ آتا کچ انا اعتبار اٹ ارٹمیکو و زوال کروک آتا حساب وکتاب اٹ مسٹ میکو زہمی ملک ءِ۔ امریکہ ٹی کورونا دین آن زہمی بندغ آتا کچ اسہ کروڑ 53 لکھ آن ودانے وخت اس کہ مچ آ ملک اٹی دین انا سوب داتم اسکان 2 لکھ 90 ہزار آن زیات بندغ زوال کرینو۔ ملک اٹی کورونا دین انا ناجوڑ آتا کچ 15369046ءِ۔ امریکی محکمہ جان جوڑی نا رداٹ ملک اٹی کورونا دین انا فعال زہمی تا کچ 6096357ءِ وخت اس کہ دا ہلوک آ دین آن داتم اسکان 290443بندغ زوال کرینو۔ امریکہ ٹی کورونا دین انا سوب داتم اسکان جم زوال کروک آتا کچ دنیا ٹی ہرملک اٹی غٹ آن زیات ءِ۔ بھارت اٹی ہلوک آ کورونا دین زہمی تا کچ 97 لکھ ءِ۔ تدوک آ 24 گھنٹہ ٹی ملک اٹی کورونا دین انا 32981پوسکن ءُ کیس رپورٹ مسنے۔ کمامدارآتا پاننگ ءِ کہ داٹی مچ آ ملک اٹی کورونا دین آن پین 391 بندغ زوال کرینو۔ کورونا دین انا ناجوڑ آتا اعتبار اٹ بھارت دنیا نا ارٹ میکو غٹ آن زیات زہمی ملک ءِ، ملک انا چندی ریاست آتیٹی کورونا دین آن زہمی بندغ آتا کچ ودسا 9703908مسنے وخت اس کہ بھارتی وزارت جان جوڑی نا حساب وکتاب نا رداٹ مچ آ ملک اٹی کورونا دین انا فعال کیس آتا کچ 383968ءِ۔ وزارت جان جوڑی نا کمامدارآتارداٹ بھارت اٹی کورونا دین آن داتم اسکان جم وڑاٹ 140994بندغ زوال کرینو۔ لاطینی امریکی ملک برازیل اٹی ہلوک آ کورونا دین آن زہمی بندغ آتا کچ 66 لکھ 28 ہزار ءِ وخت اس کہ مچ آ ملک اٹی دین آن داتم اسکان اسہ لکھ 77 ہزار 3 سد آن زیات بندغ زوال کرینو۔ برازیل اٹی تدوک آ 24 گھنٹہ ٹی کورونا دین انا 20371 پوسکن ءُ کیس مون آ بسنے ہراڑآن پک ناجوڑ آتا کچ 6628065مسنے۔ برازیل اٹی داوخت آ کورونا دین انا 649610 فعال ناجوڑ ءُ۔ برازیل نا وزارت جان جوڑی نا حساب وکتاب نا رداٹ ملک اٹی تدوک آ 24 گھنٹہ ٹی کورونا دین آن پین 376 بندغ زوال کرینو۔ کمامدارآتارداٹ ملک اٹی کورونا دین آن زوال کروک آتا پک کچ 177388ءِ۔ فرانس اٹی کورونا دین آن زہمی بندغ آتا کچ 22 لکھ 95 ہزار آن زیات مس، ملک اٹی داتم اسکان ہلوک آ دین آن 55 ہزار 5 سد آن زیات بندغ زوال کرینو۔ ملک اٹی کورونا دین آن داتم اسکان 2295908بندغ زہمی مسنو۔ کمامدارآتارداٹ فرانس نا چندی ہسپتال آتیٹی کورونا دین آن زہمی پین 366 بندغ دم تسر۔ فرانس اٹ دا وخت آ کورونا دین انا فعال ناجوڑ آتا کچ 2070102ءِ۔ کمامدارآتارداٹ تدوک آ دے ملک انا چندی علاقہ غاتیٹی کورونا دین انا 3411پوسکن ءُ کیس مون آ بسنے۔ فرانس اٹی کورونا دین آن داتم اسکان جم وڑاٹ 55521 بندغ زوال کرینو۔ برطانیہ ٹی کورونا دین آن زہمی بندغ آتا کچ 17 لکھ 37 ہزار آن زیات مس۔ ملک اٹی داتم اسکان ہلوک آ دین آن 61 ہزار 4 سد آن زیات بندغ زوال کرینو۔ وزارت جان جوڑی نا کمامدارآک پاریر کہ تدوک آ 24 گھنٹہ ٹی برطانیہ ٹی کورونا دین آن پین 189 بندغ زوال کرینو۔ ملک اٹی کورونا زہمی تا جم کچ 1737960ءِ، داوخت آ ملک اٹی کورونا دین انا 14718 پوسکن ءُ کیس رپورٹ مسنے۔ برطانیہ ٹی دا ہلوک آ دین آن ملک اٹی داتم اسکان 61434 بندغ زوال کرینو۔
