اسلام آباد۔ 02 دسمبر (اے پی پی) وزیراعظم نا سلاہکار داخلہ واحتساب بیرسٹر شہزاد اکبر پارینے کہ اسحاق ڈار انٹرویو ٹی بے نقاب مسنے۔ اسحاق ڈار جائیداد نا بابت دروغ تڑینے، اونا پاکستان اٹی چندی جائیداد آک ءُ۔ ملتان اٹی اپوزیشن نا جلسہ آخا جلسی ئس، اپوزیشن بے سہب کوشست کننگ ءِ۔ گلگت بلتستان نا گچین کاری تیٹی سرسہبی آن پک مس کہ پی ٹی آئی داوخت آہم غٹ آن پنی آ جماعت ءِ۔ نواز شریف و اسحاق ڈار ءِ وطن آ پدی اتنگ کن گام گیج کننگ اُن۔ داخیال آتا درشانی ءِ او وزیراعظم نا خصوصی کمکار سیاسی امور ڈاکٹر شہباز تون اوار پریس کانفرنس کرسا کرے۔ وزیر اعظم ناسلاہکار داخلہ و احتساب بیرسٹر شہزاد اکبر پارینے کہ بی بی سی آ نروک آ بندغ نا انٹرویو آن الس چس ہلک۔ 3 سال مست اسحاق ڈار پاکستان آن ہنا۔ او ہندن ءُ درمان اس کرفنگ ءِ ہرانا درمان برطانیہ ٹی ہم اف۔ اوپارے کہ اسحاق ڈار درملکی صحافی نا سوج آتا ورندی ءِ تننگ کتو۔ اسحاق ڈار انٹرویو ٹی بے نقاب مسنے، اسحاق ڈار شاید کس اسے نا پرمان آ درملکی چینل ءِ انٹرویو تننگ کن ہنا۔ اوپارے کہ نواز شریف مستین اٹ شکنجہ ٹی بس تو اسحاق ڈار اقبالی بیان تسوسس۔ دوبہ خلنگاکہ نیب انا حراست اٹی کیہی بندغ آک زوال کریر۔ اسحاق ڈار اسہ بندغ اسے نا پن ءِ توپائے۔ سلاہکار داخلہ پارے کہ اسحاق ڈار پارے کہ اونا پاکستان اٹی اسہ جائیداد اسے۔ بی بی سی ننتون رابطہ کروسس نن ہی ایف بی آر آن سرجم آتے مون تسنہ۔ اسحاق ڈار تون پاکستان اٹی کیہی جائیداد آک ءُ۔ اسحاق ڈار جائیداد نا بابت دروغ تڑینے۔ اوپارے کہ ملتان اٹی اپوزیشن نا جلسہ آخا جلسی ئس۔ ملتان اٹی دابیرہ جلسہ کن 6 آن 7 ہزار بندغ یکجا کننگ کریر۔ داسہ اپوزیشن ءِ لاہور اٹی جلسی کروئی ءِ۔ اوپارے کہ کورونا نا اولیکو ریسہ ٹی الس نا کمک اٹ ایس او پی تیا عملدرآمد آن بچاسن۔ ارٹ میکو ریسہ ٹی ایس او پی تیا عملدرآمد نا بناءِ کرینن۔ پاکستان نا کووڈ آن پد ہم جی ڈی پی پلس اٹی ءِ۔ اوپارے کہ اپوزیشن بے سہب کوشست کننگ ءِ۔ گلگت بلتستان نا گچین کاری تیٹی سرسہبی آن پک مس کہ پی ٹی آئی داوخت آ ہم غٹ آن پنی آ جماعت ءِ۔ شہزاد اکبر پارے کہ اسحاق ڈار اسہ دوبہ دار اسے۔ اودے پدی اتنگ کن درخواست ہم کننگانے۔ اسحاق ڈار برطانیہ ٹی سیاسی پناہ نا درخواست تسنے۔ نواز شریف اسہ ڈوہدار اسے او وزٹ ویزہ غا برطانیہ غا ہنا۔ برطانوی حکومت تون رابطہ کرے و چھٹی اس ہم گدریفینے۔ چھٹی ٹی نواز شریف ءِ پاکستان ڈیپورٹ نا خواست کننگانے۔ نواز شریف نا ویزہ ءِ کینسل کننگ نا ہم چھٹی ٹی پاننگانے۔ برطانوی حکومت تون ہیت وگپ چلینگ انگ اٹی ءِ۔ نوازشریف نا وزٹ ویزہ 6 تُو انا ئس۔ نواز شریف نا ویزہ ٹی ودی مننگ داسکان سلوک ءِ۔ ڈی پورٹ کننگ نا اختیار ایگزیکٹو تون ءِ۔ اوپارے کہ تدوک آ اِراحکومت الطاف حسین نا پدی اتنگ نا کوشست کننگتو۔ ننا دور حکومت اٹی چندی گام گیج کننگا ہرافتا رداٹ اونا برخلاف برطانیہ ٹی کارروائی کننگ انگ ءِ۔ وزیراعظم نا خصوصی کمکار سیاسی امور ڈاکٹر شہباز گل پارے کہ مریم نواز نت تا لڑزنگ نا ہیت کیک، درو اسحاق ڈار نا کس اس نت ءِ ہلوسس ہروسس تو معلوم مسکہ کہ نک امر لڑزرہ۔ پاکستان نا دشمن کوشست کننگ ءُ کہ پاکستان ءِ فاشٹ ملک ڈکلیئر کرفنگے۔ داہم پاکستان ءِ فاشٹ ملک اس گوندنگ نا کوشست کننگ ءُ۔ ہراٹی اوفتے بے سہب تون مون تروئی تما ہرانا کریڈٹ حکومت، پاک فوج و قوم ءِ کاہک۔ اوپارے کہ انٹرویو ٹی پاننگاکہ الیکشن دُزی مسوسس۔ اینکر پارے کہ نے پیٹیشنز فائل کروئی مروسس۔ خصوصی کمکار پارے کہ درملکی چینل نواز شریف نا انٹرویو کن ہُرے آن کوشست کریکہ۔ اسحاق ڈار نا انٹرویو ٹی خن تیٹی شرمندگی و بے شرمی چمک تسکہ۔ پاکستان اٹی منی لانڈرنگ اٹ اسحاق ڈار ءِ دائی نا درجہ دوئی ءِ۔ اوپارے کہ اسحاق ڈار تون اوار ایلوک ملک آ برسا عدالت آتیٹی پیش مریر و میڈیا آہم برسا ہیت کننگ کیرہ۔ اسحاق ڈار تینٹ انٹرویو تننگ کن ہنتو۔ ذبح مننگ کن پیش کننگاسس۔ الس نا مون آ اونا اصل دروشم ءِ تخنگ خواہنگ اُن۔ الس اسحاق ڈار نا انٹرویو ءِ وار اوار آ اُریر۔ ہرا اسہ کلرک اس جوڑ مننگ کتو کہ او پاکستان نا وزیر خزانہ رہینگانے۔ اوپارے کہ مریم نواز ہم ہراتم کہ ہیت کیک دروغ تڑک۔
