واشنگٹن۔ 20 نومبر (اے پی پی) امریکہ نا صدارتی گچین کاری 2020ء نا آخریکو نتیجہ ہم بسنے ہراٹی ڈیموکریٹک پارٹی نا صدارتی اومیتدار جوبائیڈن غیر سرکاری نتیجہ غاتا رداٹ سرسہب مسنے۔ امریکی خبررساں ادارہ ایسوسی ایٹڈ پریس نا رداٹ الیکشن کمامدارآک جارجیا نا نتیجہ غاتا پڑو ءِ کرینو ہرانا رداٹ جوبائیڈن صدر ٹرمپ انا مقابلہ ٹی 12 ہزار زیات وونٹ ہلکونے۔ جارجیا ٹی سرسہبی آن پد جوبائیڈن نا الیکٹورل وونٹ اٹی پین 16 وونٹ نا ودکی مسنے۔ پوسکن گچین مروک آ امریکی صدر جوبائیڈن نا الیکٹورل وونٹ انا کل کچ 306 مسنے وخت اس کہ اونا مد مقابل صدر ٹرمپ 232الیکٹورل وونٹ ہلکونے۔ ارٹ میکو کنڈآ صدر ٹرمپ گچین کاری تیٹی پدریسہ دھاندلی نا دوبہ خلنگ ءِ۔ جارجیا نا گچین کاری نتیجہ غاتیا ہم اوتینا اسہ ٹویٹ اسے ٹی دعویٰ کرینے کہ جارجیا نا چندی کاؤنٹ آتیٹی ہزار آ ہندن ءُ وونٹ ملانے ہرافتے حساب کننگتنے۔ اودعویٰ کرینے کہ بھاز زوت جارجیا نا نتیجہ غاک ری پبلکن نا حق اٹی بریرہ۔ ہمیڑے جوبائیڈن صدر ٹرمپ انا کنڈآن دھاندلی نا دوبہ، گچین کاری تیٹی شکست ءِ امنا کپننگ و انتقال اقتدار کن اوڑتون کمک کپننگ نا عمل ءِ اشتعال انگیز گوندانے۔ یات سلے کہ جارجیا ٹی ڈیموکریٹک پارٹی 25 سال آن پد سرسہبی دوئی کرینے۔
