اقوام متحدہ۔ 12 نومبر (اے پی پی) اقوام متحدہ نا جنرل اسمبلی نا مین کمیٹی جوہری سلہہ تخپروک آ ملک آتے جوہری سلہہ غاتا کاریم اٹ اتنگ نا دھڑکو یا اوفتا کاریم اٹ اتنگ آن رکھ انا باوری کرفنگ نا معاہدہ نا بارواٹی پاکستان نا پیش کروک قرارداد ءِ بھلو گیشتری اسے اٹ منظور کرے ہرانا 193 باسکی جنرل اسمبلی ہم زوت منظوری ءِ ایتک۔ پاکستان نا کنڈآن دا قرارداد ہرانا سرحال ’جوہری سلہہ تخپروک آ ملک آتے جوہری سلہہ غاتا کاریم اٹ اتنگ نا دھڑکو یا اوفتا کاریم اٹ اتنگ آن رکھ انا باوری کرفنگ نا بارواٹی گچین جہانی بست وبند آتا پوروی‘ ءِ سلہہ غاتا چٹفنگ و جہانی سلامتی نا باندات نا بابت جنرل اسمبلی نا فرسٹ کمیٹی ٹی پیش کننگا۔ قرارداد نا مخ تفی ٹی 119 وونٹ تما وخت اس کہ اسہ باسک اس ہم قرارداد نا مخالفت اٹ وونٹ تتو۔ 60 باسک آک وونٹنگ اٹی بشخ ہلتوس۔ غیر وابستہ ملک آتا تحریک نا باسک آتا بھلو کچ اس ہرافتے ٹی چین و جاپان ہم اوار ءُ قرارداد نا مخ تفی ءِ کریر ولے امریکہ، بھارت و یورپی ملک آک ووٹنگ اٹ بشخ ہلتوس داقرارداد نا منظوری آن جنرل اسمبلی دا عزم انا درشانی ءِ کیک کہ ایٹمی ملک آتا کنڈآن جوہری لائخی تخپروک آ ملک آتے جوہری سلہہ غاتا کاریم اٹ اتنگ یا کاریم اٹ اتنگ نا دھڑکو تیان رکھ ءِ پک کننگ کن دمدستی معاہدہ و ایلو جہانی بست وبند آتا گرج ءِ۔ قرارداد نا رداٹ چونکہ کانفرنس و ڈس آرمامنٹ و جوہری سلہہ غا جہانی کنونشن نا اصولی وڑاٹ دا معاملہ غا ہچ ءُ اعتراض اس اف ہنداخاطرآن غٹ ملک آک خاص کر جوہری سلہہ تخوک آ ملک آک داوڑنا موثر معاہدہ کن اواری اٹ کاریم کیر ۔ ہرانا پابندی غٹ اکن المی مرے۔ داقرارداد منظوری کن بروک آ تُو جنرل اسمبلی ٹی پیش کننگک۔ داقرارداد اتون علاقائی کہول آ سلہہ غاتا چٹفنگ نابارواٹی پاکستان نا پین مسہ قرارداد ہم جنرل اسمبلی ٹی پیش کننگک ہرافتا منظوری ءِ جنرل اسمبلی نا فرسٹ کمیٹی مہالو آن تسنے۔ دا قرارداد آتے ہم باسک ملک آتا پبی مخ تفی دوئی ءِ۔
