واشنگٹن۔ 12 نومبر (اے پی پی) پوسکن گچین مروک امریکی صدر جوبائیڈن مسکوہی صدر باراک اوباما نا سینئر وائٹ ہاؤس کارندہ رون کلین ءِ وائٹ ہاؤس نا چیف آف اسٹاف پن کرینے۔ وائٹ ہاؤس چیف آف اسٹاف نا زمواری تیٹی صدر نا ہڑدے نا شیڈول ءِ ترتیب تننگ اوار ءِ ہرانا پنداری کن سینٹ نا منظوری نا گرج مریک۔ برطانوی خبررساں ادارہ نا رداٹ دا بابت جوبائیڈن نا اقتدار نا منتقلی نا ٹیم تدوک آ دے جاری اسہ بیان اسے ٹی پارے کہ جوبائیڈن پارینے کہ او ملک ءِ یکجا کننگ و تنکی آن کشنگ کن وائٹ ہاؤس نا چیف آف اسٹاف اٹی ہراجُوانی تے ہُننگ خوہاک اورون کلین اٹی اریر۔ او نئے بیرہ سیاسی پڑاٹ ہروڑنا مخلوق تون کاریم کننگ نا لائخی تخک بلکن بھلو آزموندہ اس ہم تخک۔ ہراڑآ رون کلین تینا بیان اٹی پارے کہ او پوسکن گچین مروک آ صدر جوبائیڈن نا اوڑآ کروک آ پت آ منت وار ءِ۔ اوپارے کہ او جوبائیڈن نا ملک اٹی تقسیم نا چٹفنگ و بدلی نا ایجنڈا کن اونا ٹیم اتون وائٹ ہاؤس اٹ کاریم کننگ نا چاری ءِ۔ رون کلین 1989آن 1992 اسکان سینیٹ نا جوڈیشری کمیٹی کونسل نا سروک رہینگا۔ او 1988 و 2008 ء ٹی جوبائیڈن نا گچین کاری مہم اٹی سلاہکار و سپیچ رائٹر نا خذمت ءِ ہم سرتس وخت اس کہ 2009 ء ٹی باراک اوبامہ نا دور حکومت اٹی نائب صدر جوبائیڈن نا چیف آف اسٹاف ہم رہینگا۔
